Fyrispurningur um § 11

100-2 Fyrispurningur til Bill Justinussen, landsstýrismann, viðvíkjandi játtan og nýtslu á § 11 fyri ár 2003

Ár 2003, mikudagin 17. september, boðaði formaðurin frá omanfyri nevnda fyrispurningi frá Andrias Petersen, løgtingsmanni, sum var soljóðandi:

Fyrispurningur

Kann landsstýrismaðurin geva Løgtinginum eina meting av samlaðu nýtsluni innan § 11 á fíggjarlógini (Familju- og heilsumál) fyri ár 2003 á øllum konti, har mett verður, at játtanin ikki kemur at halda? Talan er um allar rakstrar-, lógarbundnar og aðrar útreiðslur fyri árið, sæð í mun til játtanina á fíggjarlógini. Metingin ynskist fyri hvørja høvuðskonto sær.
Um landsstýrismaðurin ikki metir, at játtanir koma at halda, hvørji stig ætlar hann so at taka fyri at tryggja, at hesar halda?

Viðmerkingar
Fyrispurningurin er settur fyri at fáa neyvari meting av nýtsluni á ávísum játtanum á fíggjarlógini fyri ár 2003. Verandi játtanir á fíggjarlógini eru ásettar síðsta heyst, tá fíggjarlógaruppskotið fyri ár 2003 varð lagt fyri tingið og seinni samtykt í Løgtinginum við ávísum broytingum.

Væntandi hevur landsstýrismaðurin nýtslutøl tøk fyri teir fyrstu 8 til 9 mánaðirnar í ár, tá spurningurin eigur at verða svaraður, og harvið betri møguleika at meta um røttu nýtsluna fyri árið.

Á tingfundi 17. september 2003 varð samtykt uttan atkvøðugreiðslu, at fyrispurningurin skal svarast.

Á tingfundi 14. oktober 2003 svaraði Bill Justinussen, landsstýrismaður, fyrispurninginum soleiðis:

Svar:

Mett verður, at játtanin til lógarbundnar útreiðslur fer at halda. Í sambandi við játtanir til aðrar kontur verður mett, at fylgjandi kontur koma at hava meir- ella minninýtslu í hesum fíggjarárinum:

		Játtan	Væntað nýtsla	Munur
		í tkr.	í tkr.	í tkr.
11.11.1.24	Familju- og heilsumálaráðið	17.036	14.936	-2.100
11.11.1.38	Familjuøki	1.000	500	-500
11.20.2.01	Sjúkrakassar	26.897	29.015	2.118
11.20.2.07	Skúlalæknaskipanin	325	110	-215
11.20.2.08	Apoteksverkið	-225	-3.000	-2.775
11.20.3.04	Landssjúkrahúsið	259.272	263.172	3.900
11.20.3.10	Klaksvíkar sjúkrahús	45.787	47.217	1.430
11.20.3.15	Suðuroyar sjúkrahús	33.519	34.143	624
11.20.3.20	Serviðgerð uttanlands	69.950	82.000	12.050
11.20.5.01	Lánsafturgjald	-250	-970	-720
11.21.9.04	Námsfrøðingar í framhaldsútbúgving	187	27	-160

Viðvíkjandi høvuðskontunum Serviðgerð uttanlands og Sjúkrakassar verður neyðugt, at søkja um eykajáttan. Familju- og heilsumálaráðið hevur í hesum árinum sett ávís tiltøk í verk til at royna at tálma nýtsluni á kontuni Serviðgerð uttanlands. Millum annað er fulltrúi settur burturav til hetta økið, og mannagongdir eru broyttar innan serviðgerðina. Men tað tekur eina tíð at síggja virknaðin av hesum. Landsstýrismaðurin í familju- og heilsumálum fer at søkja um at flyta ikki brúkta játtan frá øðrum høvuðskontum innan § 11 til omanfyrinevndu kontur. Landsstýrismaðurin í familju- og heilsumálum hevur sent skriv til rakstrarstovnarnar við áheitan um, at halda útreiðslurnar innan fyri verandi karm.

Málið avgreitt.