A. Upprunauppskot
B. 1. viðgerð
C. Orðaskifti við 1. viðgerð

Ár 2004, 30. mars, legði Bárður Nielsen, landsstýrismaður, vegna landsstýrið fram soljóðandi  

1. Løgtingið tekur undir við, at landsstýrismaðurin í fíggjarmálum heimilar Fíggingargrunninum frá 1992 at skipa fyri frægasta lutfallinum millum egin- og fremmandakapital í P/F Føroya Banka við niðurskriving av kapitalpørtum grunsins í P/F Føroya Banka samsvarandi fakligari tilráðing frá óheftum ráðgevingarstovni.
   
2. Løgtingið tekur undir við, at landsstýrismaðurin í fíggjarmálum heimilar Fíggingargrunninum frá 1992 at selja upp til 20% av partabrøvum grunsins í P/F Føroya Banka.

Almennar viðmerkingar
Tann 29. apríl 1996 samtykti Løgtingið í løgtingsmáli nr. 53/1995 við 24-1-0 atkvøðum uppskot til ríkislógartilmæli um lóg um Fíggingargrunnin frá 1992. Uppskotið varð eftir hetta samtykt á Fólkatingi og sett í gildi sum lóg nr. 462 frá 12. juni 1996.

Viðmerkingarnar í sambandi við løgtings- og fólkatingsviðgerðina vísa, at endamálið við lógini var at skapa rættarligt grundarlag fyri, at landskassin kundi fáa pening goldnan úr grunninum, hóast hetta var í stríð við aðalregluna í sambandi við sjálvsognarstovnar - her undir eisini vinnurekandi grunnar - um, at innskotin peningur ikki kann verða goldin aftur til stovnaran av grunninum.

Í § 9 í viðtøkunum fyri Fíggingargrunnin frá 1992, sum vórðu broyttar samsvarandi heimildunum í lóg nr. 462 frá 12. juni 1996, er ásett, at nevndin fyri grunnin ikki uttan samtykt landsstýrismansins kann taka avgerð um:

1. at atkvøða fyri niðurskriving av kapitalpørtum hjá grunninum í Føroya Banka ella
2. at avhenda parta- ella ábyrgdarakapital í Føroya Banka (sí fylgiskjal 1).

Í skrivi til Fíggjarmálaráðið, dagfest tann 19. oktober 2000, greiðir nevndin í Fíggingargrunninum frá 1992 frá ætlan um at selja upp til 20% av partabrøvum grunsins í Føroya Banka (sí fylgiskjal 2). Nevndin vísir í hesum viðfangi til frágreiðing frá 1997/98 um umskipan av ognarviðurskiftum í P/F Føroya Banka (sí fylgiskjal 3).

Í skrivinum frá 19. oktober 2000 heitir nevndin somuleiðis á landsstýrismannin í fíggjarmálum um at boða frá støðu síni til, at grunninum verður heimilað at selja t.d. upp til 20% av partabrøvunum í Føroya Banka, svarandi til 200.000 partabrøv áljóðandi á 100,- kr.

Grunnurin hevur enn ikki fingið svar upp á fyrispurning sín. Orsøkir til hetta eru m.a., at grundleggjandi greiningararbeiði og politisk viðgerð viðvíkjandi einskiljingar-fyribrigdinum fór fram í árunum 2001-02. Somuleiðis gekk drúgv tíð at leggja til rættis politiska og embætisliga fyrisiting av einskiljingartilgongd í árunum 2002-03.

---

Landsstýrismaðurin í fíggjarmálum hevur ta fatan, at møgulig søla av partabrøvum Fíggingargrunsins í Føroya Banka er at rokna sum einskiljingarmál. Samsvarandi innganginum í leiðreglunum um at einskilja fyritøkur landsins ynskir hann tískil at virka fyri breiðari politiskari semju í hesum máli.

Landsstýrismaðurin ger tó vart við, at Fíggingargrunnurin er vinnurekandi grunnur, og heitir á tey, sum luttaka í politisku viðgerðini av hesum máli, um at hava hetta í huga.

---

Einskiljingarnevndin hevur, samsvarandi leiðreglunum um at einskilja fyritøkur landsins, havt ætlanina hjá grunninum til viðgerðar. Nevndin metir, at ætlanin hjá grunninum er í samsvari við yvirskipaðu samfelagsligu málini, ið eru ásett í leiðreglunum, og sum landsstýrið hevur sett sær fyri at røkka.

Nevndin metir í hesum viðfangi, at grunnurin í ætlanum sínum hevur tikið hóskandi atlit til, at kappingin á føroyska fíggjarmarknaðinum ikki verður minni. Við hesum kemur sølan ikki at hótta brúkaraáhugamál.

Einskiljingarnevndin tekur undir við uppskoti Fíggingargrunsins um mannagongd fyri partabrævasølu, sum lýst er í niðurstøðunum í frágreiðingini frá 1997/98, og mælir landsstýrismanninum til at veita grunninum tær heimildir, ið grunninum tørvar viðvíkjandi kapitalumskipan og sølu av partabrøvum í Føroya Banka.

---

Ítøkiligi myndilin, sum Fíggingargrunnurin hevur skotið upp fyri broyting av ognarviður-skiftunum í Føroya Banka, er fylgjandi (her endurgivið úr niðurstøðum úr Frágreiðing um umskipan av ognarviðurskiftum Føroya Banka. Hendan frágreiðingin varð almannakunngjørd sum partur av ársfrágreiðing Fíggingargrunsins fyri 1997):

Avleiðingar av uppskotinum
Endamálið við at lata óhefta kanning gera um kapitalviðurskiftini hjá Føroya Banka er at normalisera kapitalviðurskiftini í bankanum. Greitt er tó ikki, hvussu stór ein møgulig upphædd verður frígjørd í hesum viðfangi. Hetta er spurningur, sum verður svaraður við kanningini, ið gerast skal av óheftum parti, sum nevnt í frágreiðingini frá 1997/98. Í frágreiðingini frá 1997/98 verður mælt til at broyta kapitalbygnaðin við hóskandi atliti til reglurnar í banka- og sparikassalógini, vakstrarmøguleikar bankans og tey serligu viðurskiftini, sum gera seg galdandi í føroyskum búskapi og vinnulívsbygnaði. Mett verður tí ikki, at broyting í kapitalviðurskiftunum fær stórvegis ávirkan á bankavirksemið hjá Føroya Banka.

Mett verður ikki, at søla av upp til 20% av partapeninginum hevur við sær týðandi avleiðingar fyri virksemi bankans.

Møgulig útluting av kapitali í sambandi við, at eginkapitalur í Føroya Banka verður tillagaður, hevur í fyrstu atløgu ikki avleiðingar við sær fyri landskassan. Sama er galdandi í sambandi við sølu av partabrøvum hjá Fíggingargrunninum. Fíggjarligar avleiðingar fyri landskassan gerast bert galdandi í tann mun, nevndin fyri Fíggingargrunnin tekur avgerð um at flyta landskassanum pening úr grunninum. 

Fylgiskjal 3. Frágreiðing um umskipan av ognarviðurskiftum í Føroya banka

Vísandi til § 54, stk. 2 í tingskipanini vátta undirritaðu tingmenn við hesum, at teir viðmæla, at løgtingsmál nr. 60/2003: Uppskot til samtyktar um at heimila Fíggingargrunninum frá 1992 at broyta ognarviðurskiftini í Føroya Banka verður lagt fram:

1. viðgerð 2. apríl 2004. Málið beint í fíggjarnevndina.

Málið fall burtur sbr. stýrisskipanarlógini § 15, stk. 3, tí at løgtingsval var 20. januar 2004, og málið ikki var liðugt viðgjørt á tingi fyri valið.