Fyrispurningur um tyrlutilbúgving
100-14 Fyrispurningur til Jørgen Niclasen, landsstýrismann,
viðvíkjandi tyrlutilbúgving í Føroyum
Ár 1999, hósdagin 16. december, boðaði
formaðurin frá omanfyri nevnda fyrispurningi frá Tórbjørn Jacobsen, løgtingsmanni,
sum var soljóðandi:
Fyrispurningur
- Metir landsstýrismaðurin í
fiskivinnumálum, at tyrlutilbúgving í Føroyum er føroyskt ella
danskt ábyrgdarøki?
- Metir landsstýrismaðurin í fiskivinnumálum, at
tyrlutilbúgvingin í Føroyum er nóg góð og munadygg, soleiðis at
hon kann tryggja sjófólki okkara og útoyggjafólki ta bestu og ta neyðugu trygdina ?
Viðmerkingar:
Um so er, at fyrispurningurin um hesi
viðurskifti hjá háttvirda løgtingsmanni, Henriki Old, frá 16. september 1999, stendur
einsamallur saman við svarinum hjá Vibeke Larsen, ríkisumboðsmanni, frá 24. november
1999, tá kunnu løgtingsmenn, og fyri alt tað Føroya fólk yvirhøvur, lættliga fáa
ta fatan, at um bert hitt danska sjóverjuskipið við tyrlu framhaldandi verður í
Føroyum, so er hetta borganin fyri, at vit hava eina nóg góða tyrlutilbúgving, sum
kann veita sjófólki okkara og útoyggjafólki hina bestu trygdina.
Tað munnu vera mong saman við undirritaða, sum
ivast í hesi trygdini, og sum meta, at hon stendur á einum alt ov veikum grundarlagi, og
at Føroyar í veruleikanum hava eina alt ov óskipaða, fyri ikki at siga vánaliga,
tyrlutilbúgving.
Á tingfundi 20. december 1999 varð samtykt
uttan atkvøðugreiðslu, at fyrispurningurin skal svarast.
Á tingfundi 21. mars 2000 svaraði Jørgen
Niclasen, landsstýrismaður, fyrispurninginum soleiðis:
Svar:
- Tyrlutilbúgvingin er knýtt aftrat
sjóbjarging, sum er føroyskt sermál og ábyrgdarøki hjá Føroyum. Við gildi frá 1.
januar 1969 varð sjóbjargingartænastan løgd til Færøernes Kommando og frá 1978
varð ásett, at Vaktar- og bjargingartænastan skuldi taka sær av tí føroyska
partinum. Ein samstarvsavtala varð gjørd partanna millum, sum er í gildi enn.
Tyrlutænastan er ein partur av bjargingartænastuni og í nógv ár hevur tann danska
tyrlan á sjóverjuskipum teirra verið nýtt til hesa uppgávu. Í nógvum førum verður
eisini tann føroyska tyrlan nýtt til leiting og bjarging á sjógv og landi og
sjúkraflutning.
- Verandi tyrlutilbúgving er ikki nóg góð og
munadygg, at hon tryggjar bæði sjófólki og útoyggjafólki ta bestu og neyðugu
trygdina. Royndir og samstarv við sjóverjutyrluni og teirri føroysku tyrluni í
arbeiðinum um leiting og bjarging á sjógv og landi, sjúkraflutningi og tá vanlukkur
henda vísa, at tað altíð mugu verða minst tvær tyrlur tøkar. Fyri at bøta um
viðurskiftini hevur landsstýrismaðurin tikið stig til at seta av pening á
fíggjarlógini, sum løgtingið hevur samtykt, til tess at bøta um hesi viðurskifti.
Fiskimálastýrið fer nú undir samráðingar við Atlantsflog um ein 10 ára sáttmála
til tess at tryggja eina munabetri tænastu.
Málið avgreitt.