Fjølmiðlaábyrgdarlóg

A. Upprunauppskot
B. 1. viðgerð
C. Álit
D. 2. viðgerð

Ár 2000, 4. mars, legði Alfred Olsen, løgtingsmaður, vegna Sambandsflokkin fram soljóðandi

Uppskot

til

Í ríkislógartilmæli, dagfest 23. mai 1997, um fjølmiðlaábyrgdarlóg verða gjørdar hesar broytingar:

1. Pkt. 11) verður orðað soleiðis:
   11) § 41 verður orðað soleiðis:
   "§ 41. Der oprettes et særligt færøsk pressenævn bestående af en formand og 6 andre medlemmer, der beskikkes af justitsministeren. Formanden og næstformanden, der skal være jurister, beskikkes efter udtalelse fra sorenskriveren, 2 medlemmer beskikkes efter udtalelse fra Blaðmannafelagið (Færøernes journalistforbund), 2 medlemmer beskikkes til at repræsentere de redaktionelle ledelser i den trykte presse, radio og fjernsyn på Færøerne efter udtalelse fra disse, og 2 medlemmer beskikkes som offentlighedens repræsentanter i nævnet blandt de personer, der er optaget på nævningelisten."
2. Pkt. 12) verður orðað soleiðis:
   12) Í § 42 verða orðini "Dansk Journalisforbund" broytt til "Blaðmannafelagið (Færøernes journalistforbund)"
3. Pkt. 14) verður strikað.

 

Í løgtingsmálum nr. 50 og 51/1999 hevur Høgni Hoydal, landsstýrismaður, mælt løgtinginum til at taka av ríkislógartilmæli frá 23. mai 1997 um fjølmiðlaábyrgdarlóg og í staðin at seta í gildi løgtingslóg um sama evni.

Sambandsflokkurin metir ikki, at lógarheimild er fyri at gera løgtingslóg á umrødda øki. Málsøkið kann ikki yvirtakast, tá ið tað ikki stendur á lista A og B í heimastýrislógini. Skal løgtingslóg gerast á økinum, er neyðugt, at tað fæst at vita frá Ríkisumboðnum, at heimastýrið hevur heimild til tess.

Slíka váttan frá ríkismyndugleikunum noktar Høgni Hoydal at útvega rættarnevndini. Grundgeving hansara fyri hesum er burturvið, við tað at hansara útgangsstøði ikki er galdandi lóggáva, men tað, sum møguliga fer at galda í framtíðini, sum ikki er sannlíkt. Slíkt ber ikki til, tí Løgtingið má og skal altíð halda seg til lóggávuna, sum er galdandi í dag.

Tá ið landsstýrismaðurin ikki vil spyrja ríkisumboðsmannin, má hetta takast sum tekin um, at lógarheimildin ikki er í lagi.

Er svar ríkisumboðsins, at lógarheimildin er í lagi, so er einki at ivast í, so kann farast undir at gera løgtingslóggávu um evnið.

Ikki fer at bera til, at eingin fjølmiðlaábyrgdarlóg er, sum hóskar til okkara umstøður. Tí sær Sambandsflokkurin onga aðra loysn enn at gera broyting í samtykta ríkislógartilmælinum soleiðis, at løgmálaráðharrin tekur undir við at seta lógina í gildi fyri Føroyum.

Samsvarandi hesum verður tí hetta uppskot sett fram.

24. mars 2000. Málið beint í rættarnevndina, sum tann 2. mai 2000 legði fram soljóðandi

Landsstýrið hevur lagt málið fram tann 4. mars 2000, og eftir 1. viðgerð tann 24. mars 2000 er tað beint rættarnevndini.

Rættarnevndin hevur viðgjørt málið á fundi 1. mai 2000

Meirilutin (Sámal Petur í Grund, Signar á Brúnni, Hildur Patursson, Eyðun Viderø og Rúna Sivertsen) tekur ikki undir við uppskoti Sambandsflokksins og vísir annars til viðmerkingarnar í løgtingsmálunum nr.50/1999 og 51/1999.

Ein minniluti (Hans Pauli Strøm og Alfred Olsen) mælir Løgtinginum til at samtykkja uppskotið. Ein villa er tó komin í § 41.

Samsvarandi hesum setir minnilutin fram soljóðandi

b r o y t i n g a r u p p s k o t

Í § 41 verður aftaná "en formand" skotið inn "og en næstformand"

2. viðgerð 5. mai 2000. Broytingaruppskot frá minnilutanum fall 14-0-18. Ríkislógartilmæli fall 13-1-18. Uppskotið sostatt fallið. Málið avgreitt.