Skrásetingargjaldslóg - motorakfør

A. Upprunauppskot
B. 1. viðgerð
C. Álit
D. 2. viðgerð
E. 3. viðgerð

Ár 2000, 21. januar, legði Karsten Hansen, landsstýrismaður, vegna landsstýrið fram soljóðandi

Uppskot

til

§ 1

Í løgtingslóg nr. 175 frá 18. desember 1992 um skrásetingargjald á motorakførum v.m., sum seinast broytt við løgtingslóg nr. 31 frá 23. apríl 1999, verður § 25, stk. 1, nr. 2, orðað soleiðis:

"2) Brýtur § 16, stk. 2 og § 22."

§ 2

Henda løgtingslóg kemur í gildi dagin eftir, at hon er kunngjørd.

Endamálið við hesum uppskoti er einans at gera eina broyting av § 25, stk. 1, nr. 2, so sett verður inn, at brot á § 16, stk. 2, í lógini, kunnu revsast. § 16, stk. 2, ásetir, at skrokknummar má bert verða flutt, broytt, burturbeint ella sett í við tollvaldsins loyvi.

Uppskotið hevur ikki eyka útreiðslur við sær. 

Viðmerkingar til broytingina

Henda broyting hevur til endamáls at broyta § 25, stk. 1, nr. 2, so sett verður inn, at brot á § 16, stk. 2, í lógini kunnu revsast. § 16, stk. 2, ásetir, at skrokknummar má bert verða flutt, broytt, burturbeint ella sett í við tollvaldsins loyvi.

1. viðgerð 25. januar 2000. Løgtingsmálini nr. 41, 42 og 43/1999 viðgjørd undir einum. Málið beint í fíggjarnevndina, sum tann 2. februar 2000 legði fram soljóðandi

Á l i t

Málið er lagt fram av landsstýrinum tann 21. januar 2000 og eftir 1. viðgerð tann 25. januar 2000 beint í fíggjarnevndina.

Nevndin hevur viðgjørt málið á fundum 26. januar og 2. februar 2000. Undir viðgerðini hevur nevndin havt fund við Karsten Hansen, landsstýrismann í fíggjarmálum, umboð fyri Fíggjarmálastýrið og Toll- og Skattstovu Føroya.

Ein samd nevnd tekur undir við málinum og mælir tinginum til at samtykkja uppskot landsstýrisins.

2. viðgerð 8. februar 2000. §§ 1 og 2 samtyktar 28-0-0. Uppskotið fer soleiðis samtykt til 3. viðgerð.

3. viðgerð 10. februar 2000. Uppskotið, sum samtykt við 2. viðgerð, endaliga samtykt 31-0-0. Málið avgreitt.

Lms.j.nr. 688-21/99
Fms.j.nr. 2520-18/91
Ll.nr. 18/2000 frá 14.02.2000