55 Uppskot til løgtingslóg um Postvirksemi
Skjal 2: Fyrra ummæli postverksins dagfest 15. februar 2000.
Postverk Føroya
Postverksstjórin
Óðinshædd
2
postsmoga
3009
110 Tórshavn
Telefon 31 40 48
Telefax 31 70 76
Tinganes
Postboks 64
FO 110 Tórshavn
Att: Arne Poulsen, aðalstjóri
Ummæli av
uppskotunum til løgtingslóg um postvirksemi og um umlegging av Postverki Føroya til
partafelag.
Postverksleiðslan hevur við fleiri
høvi tey seinastu árini víst á tørvin á at endurskoða lógargrundarlagið undir
postrakstrinum í Føroyum. Grundgevingarnar fyri hesum ynski hava í høvuðsheitum
verið:
· At partar av verandi
virksemi hjá Postverk Føroya ikki heilt eru í
samsvari við lógina um Postverk Føroya
frá 1976 og kappingarlógina frá 1997.
· At Postverk Føroya
undir verandi lógarskipan ikki hevur møguleika at møta teimum avbjóðingum, sum í dag
vera settar einum nútímans tænastustovni.
· At allir
samstarvspartar í okkara grannalondum hava fingið nýggjar og nútímans lógarkarmar at
arbeiða undir.
· At nýtt
lógargrundarlag er neyðugt skal Postverkið ikki tey komandi árini, orsakað av
støðugari minking í tí vanliga postvirkseminum, árliga koma at liggja tí almenna til
byrðu á fíggjarlógini við einari alsamt vaksandi peningaupphædd.
Í sambandi við at landsstýrismaðurin í samskiftismálum
í juni 1997 tók avgerð um at fara undir arbeiðið at nútímansgera
lógargrundarlagið fyri postøkið í Føroyum, varð settur niður arbeiðsbólkur at
evna til uppskot til nýtt lógargrundarlag. Verandi postverksleiðsla hevur tikið undir
við meginfyritreytunum undir kommissorinum, ið givið varð arbeiðsbólkinum.
Meginfyritreytirnar vóru hesar:
-
Landsstýrið
fær einkarrætt til postflutning.
-
Landsstýrið
kann veita konsessión til postflutning og virksemi
-
Postverk
Føroya verður gjørt til partafelag.
Postverksstjórin hevur luttikið í
arbeiðsbólkinum sum Vinnumálastýrið niðursetti eftir at landsstýrismaðurin hevði
staðfest arbeiðssetningin í juni 1997.
Postverksstjórin hevur í hesum
arbeiði lagt dent á, at við nýggja lógargrundarlagnum verður skaptur ein karmur fyri
postvirksemið í Føroyum, sum kann geva eins rúmar møguleikar at menna hetta virksemi
sum í okkara grannalondum.
Við uppskotinum til løgtingslóg um
postvirksemi metir postverksstjórin, at vit tryggja tí føroyska samfelagnum nútímans
karm um postvirksemi í síni heild, samstundis sum møguligt fyrilit kann verða tikið, at geva verandi postvirksemi hjá Postverki Føroya tað neyðuga skotbráið,
fyri at tillaga seg nýggja lógargrundarlagið.
Postverksleiðslan vísir annars til
hoyringssvar til Vinnumálastýrið, dagfest 31. januar 1999 har viðmerkingar eru
gjørdar til nakrar av teimum einstøku greinunum í lógaruppskotinum sum tað fyrilá
tá. Flestu av hesum viðmerkingum eru viðgjørdar í arbeiðsbólkinum og niðurstøður
gjørdar, ið postverksstjórin hevur tikið til eftirtektar.
Postverksleiðslan tekur sostatt undir við uppskotinum til løgtingslóg um postvirksemi, soleiðis sum hetta er orðað og latið landsstýrismanninum 9. februar 2000.
Uppskotini bæði eru ein heild. Uppskotið til lógtingslóg um postvirksemi setir krøv til teir/tey, ið fáast við postflutning. Neyðugt er sostatt at umskipa almenna stovnin Postverk Føroya, soleiðis at postraksturin framyvir verður rikin undir teimum treytum, ið fyrisettar eru í lógini um postvirksemi. Hetta krevur tillagingar av rakstrinum hjá Postverki Føroya.
Leiðslan metir tó, at við uppskotinum til løgtingslóg um umlegging av Postverkið Føroya til partafelag verður skaptur ein karmur um virksemið hjá Postverk Føroya, sum ger tað møguligt at fara undir fleiri av teimum avbjóðingum, ið Postverk Føroya - undir verandi skipan - ikki hevur havt fíggjarliga orku, at farið í holt við. Samstundis verður veitt myndugleikunum trygd fyri, at skyldan, sum áliggur tí almenna at tryggja postflutning á dygdargóðum støði, eisini verða loyst framyvir.
Postverksleiðslan tekur undir við uppskotinum til løgtingslóg um umlegging av Postverki Føroya til partafelag. Postverksleiðslan hevur ongar viðmerkingar til tær einstøku lógargreinarnar, men vil nýta høvi til at peika á fylgjandi serlig viðurskifti:
Íløgutørvurin:
Í sambandi við at felagið verður stovnað verður í lógaruppskotinum skotið upp at settar verða 56,5 mió. kr. í kontantinngjaldi í felagið. Henda upphædd svarar til tann metta íløgutørvin hjá Postverki Føroya tey komandi 3- 4 árini. Íløgutørvurin er staðfestur eftir gjøgnumgongd av øllum virksemi stovnsins primo 2000. Verandi rakstur hjá postverkinum gevur ikki pláss til nakra íløgu til nýskapandi virksemi innan postøkið. Ei heldur hevur raksturin givið pláss fyri neyðugum viðlíkahaldi tey seinnu mongu árini. Her er sostatt bæði talan um íløgur, ið ikki eru vorðnar framdar og íløgur sum eru alneyðugar, skal Postverkið liva upp til tað, ið kravt verður av einum postoperatøri í einum nútíðarsamfelag.
Eftirlønarkrøv:
Postverk Føroya hevur
síðani yvirtøkuna í 1976 verið rikið sum ein almennur stovnur. Hetta hevur havt við
sær, at stovnurin hevur fylgt tí siðvenju sum hevur verið galdandi innan almenna
fyrisiting, m.a. tá talan hevur verið um eftirlønarkrøvini, ið tey sum hava
tænastamannaeftirlønarrætt hava upptjent. Peningur
er ikki árliga settur av til hesar eftirlønir. Neyðugt hevur tí verið at goldið
eftirlønina av tí dagliga raksturin og er hetta vorðið alsamt meira tyngjandi fyri
raksturin hjá Postverki Føroya. Útgoldna eftirlønarupphæddin økist munandi tey komandi árini, so hvørt sum
fleiri av starvsfólkunum við eftirlønarrætti fara frá fyri aldur.
Við uppskotinum til umlegging av Postverk Føroya verða hesi viðurskifti skipað soleiðis, at upptjenta eftirlønarskyldan ikki kemur at tyngja dagliga raksturin.
Í sambandi við at Postverk Føroya verður umskipað til partafelag verður neyðugt við einari umskipan av sjálvum virkseminum hjá Postverk Føroya. Roknað er við at starvsfólkanýtslan yvir tey komandi 3 4 árini verður minkað við 40 50 ársverkum. Hóast meðalaldurin á starvsliðnum er høgur - um hálvthundrað ár so verður tann náttúrliga frágongdin ikki nóg stór til, at sleppast kann undan at siga starvsfólkum úr starvi.
Postverksleiðslan hevur í teimum fyritreytum, sum eru settar upp í rakstarætlanini fyri partafelagið, gingið út frá, at ásetingarnar í sáttmálanum millum Føroya Postfelag og Føroya Landsstýri, einsvæl og ásetingarnar í lóg um starvsmenn verða fylgdar, tá talan er um uppsagnartíðir v.m.
Í hjáløgdu rakstrarætlan til lógaruppskotið er peningur ikki settur av til serliga skipan fyri eldri starvsfelagar, sum møguliga kundu hugsað sær at farið úr starvi í samband við at umleggingar verða framdar. Postverksstjórin vil mæla til, at umhugsað verður at finna eina skipan sum eitt tilboð til eldru starvsfólkini í Postverki Føroya.
Innanhýsis samskifti á Postverk Føroya í sambandi
við tað fyrireikandi lógararbeiðið.
Bæði leiðsla og starvsfólk - umboðað við Føroya Postfelag - er samd um Postverk Føroya er afturúrsiglt, at neyðugt er við umfatandi broytingum, soleiðis at Postverk Føroya aftur fær møguleika at menna seg sum arbeiðspláss. Føroya Postfelag hevur yvirfyri postverksstjóranum víst á, at hetta kann verða gjørt innanfyri verandi skipan við Postverki Føroya við nakað broyttum lógarkarmum. Postverksleiðslan er harafturímóti av tí áskoðan, at neyðugt er við nýggjum og nútímans lógarkarmi, har samanhang er millum leiðslu og ábyrgd.
Postverksleiðslan hevur hetta seinasta árið áhaldandi heitt á nevndina í Føroya Postfelag um at taka aktivan lut í tí lógarfyrireikandi arbeiðinum. Føroya Postfelag hevur peikað á, at felagið er grundleggjandi ósamt við høvuðspunktini í arbeiðssetninginum sum givin varð av landsstýrismanninum í juni 1997, (sí, omanfyri). Felagið hevur í skrivum dagfest 22. sept. 1997, nov. 1997 og 12. des. 1997 gjørt viðmerkingar til lógaruppskotið um postvirksemi í tí líki, ið tað hevði tá.
Postverksleiðslan hevur sum nevnt ynskt, at Føroya Postfelag saman við leiðsluni kom til sættis um eitt felags tilmæli til Vinnumálastýrið. Hetta hevur ikki eydnast og Føroya Postfelag hevur ikki ynskt at luttikið í tí fyrireikandi lógararbeiðinum, tá hetta varð tikið upp aftur í august mánaði 1999.
Í hesum tíðarskeiði hevur postverksstjórin á starvsfólkafundum kring landið greitt frá tí fyrireikandi lógararbeiðinum og annars greitt frá, hvat ein komandi umskipan kemur at krevja av leiðslu og starvsfólkum við Postverk Føroya. Postverkstjórin er av teirri fatan, at tey, ið starvast hjá Postverkið
Føroya síggja tað neyðuga í, at skaptir verða nýggir og nútímans karmar til Postverki Føroya teirra arbeiðspláss at virka undir. Karmar, sum kunnu vera við til at skapa grundarlag fyri menning av tí dagliga arbeiðinum hjá tí einstaka.
Postverksleiðslan hevur kunnað Føroya Postfelag um gongdina í arbeiðinum hjá arbeiðsbólkinum. Føroya Postfelag hevur yvirfyri postverksleiðsluni boðað frá, at tá ið einki av høvuðskrøvum felagsins eru tikin við í lógaruppskotunum, hevur felagið ikki sæð seg ført fyri at taka undir við uppskotinum, men tekur til eftirtektar at uppskotini verða løgd fram til politiska viðgerð og støðutakan.
Eftir at postvirksemi í øllum grannalondum okkara hevur fingið nýggjar karmar at virka undir, gleðir tað postverksleiðsluna, at politiski myndugleikin nú hevur tikið stig til at fáa tí føroyska samfelagnum til vega nýggjar og tíðarhóskandi lógarkarmar fyri eitt so týðandi økið, sum postøkið hóast alt er.
Postverksleiðslan metir, at við nýggja lógargrundarlagnum verður lagt eitt gott støðið undir at menna postøkið í Føroyum, soleiðis at vinnast kann tað inn aftur, ið vit hava mist tey seinastu 10 15 árini.
Tórshavn, 15. februar 2000
Bergur í Garði, postverksstjóri