Landsstýrismannalønir

A. Upprunauppskot
B. 1. viðgerð
C. Orðaskifti við 1. viðgerð
D. Tikið aftur

Ár 2001, 3. mars, legði Alfred Olsen, løgtingsmaður, vegna Sambandsflokkin fram soljóðandi

Í løgtingslóg nr. 10 frá 8. januar 1993 um samsýning og eftirløn landsstýrismanna við seinni broytingum verða gjørdar hesar broytingar:

1. § 2, stk. 1, verður orðað soleiðis:

"Stk. 1. Tá løgmaður ella landsstýrismaður fer frá, fær hann landsstýrismannasamsýning eftir hesi reglu:

0-1 ár 3 mánaðir
yvir 1 ár 6 mánaðir

Tekur fyrrverandi landsstýrismaður sæti á tingi í omanfyrinevnda tíðarskeiði, verður samsýningin tó minkað við samsýningini eftir § 1, stk. 1, í løgtingslóg um samsýning og eftirløn løgtingsmanna.

 

§ 2

Lógin kemur í gildi 1. mai 2001.

Viðmerkingar:

Í hesum valskeiðinum hava vit fleiri ferðir upplivað, at útskiftingar hava verið av landsstýris-monnum. Onkrir av hesum landsstýrismonnum eru farnir beinleiðis úr landsstýrinum og í Løgtingið.

Hetta hevur havt við sær, at teir í fleiri mánaðir hava fingið bæði løgtings- og landsstýrismannaløn. Eisini hevur verið neyðugt at játta pening á eykafíggjarlógum fyri at gjalda hesar dupultlønir.

Tað kann ikki vera rætt, at føroyski skattaborgarin skal gjalda sama persóni fulla løgtings- og landsstýrismannaløn. Í hesum valskeiðnum er hetta hent tríggjar ferðir.

Tí verður skotið upp, at landsstýrismenn, sum fara úr landsstýrinum og beinleiðis í Løgtingið, bert fáa ta einu lønina.

Málið verður tí við hesum lagt fyri Løgtingið í vón um, at tað fær eina góða og sakliga viðgerð, og at tað vinnur frama á tingi.

1. viðgerð 6. mars 2001. Tingmálini 72 og 91 vórðu viðgjørd undir einum. Málið beint í fíggjarnevndina.

Á tingfundi 18. apríl 2001 boðaði formaðurin frá, at Alfred Olsen, løgtingsmaður, vegna Sambandsflokkin, í skrivi, dagfest 18. apríl 2001, sigur frá, at uppskotið verður tikið aftur.