Fyrispurningur um Varda Verkstaðin á Bakka

100-19 Fyrispurningur til Sámal Petur í Grund, landsstýrismann, viðvíkjandi koyringini til og frá Varda Verkstaðnum á Bakka í Vági

Orðaskifti

Ár 2001, fríggjadagin 28. september, boðaði formaðurin frá omanfyri nevnda fyrispurningi frá tingmonnunum Jóannes Eidesgaard og Henrik Old, sum var soljóðandi:

Fyrispurningur

Hvørjar ætlanir hevur landsstýrismaðurin, nú busskoyringin hjá Verkstaðnum á Bakka vegna sparingar heldur uppat 1. oktober?

Viðmerkingar:
Leiðarin á Serstovnadeildini er í bløðunum endurgivin fyri at siga, at peningurin ikki strekkir til, og tí verður busskoyringin hjá Varda Verkstaðnum á Bakka niðurløgd. Víðari verður leiðarin endurgivin fyri at siga, at tey í løtuni brúka ov nógva tíð og orku til koyring, og at tað er ikki hetta, sum tey eru dugnaligast til. At enda verður sagt, at leitað verður eftir aðrari loysn, sum kundi verið at latið Bygdaleiðum ella onkrum privatum tænastuna at reka.

Sparingin, sum verður vunnin við at niðurleggja busskoyringina, er 100.000 kr. um árið, men ivaleyst fer ein skipan við Bygdaleiðum ella onkrum privatum eisini at kosta, um ikki ætlanin er at lata brúkararnar sjálvar gjalda fyri koyringina.

Men fleiri av hesum brúkarum eru so illa fyri, at tey hava brúk fyri serflutningi, sum avheintar og koyrir tey aftur til hús. Hetta er ein fyritreyt fyri, at tey yvirhøvur kunnu koma til arbeiðis. Nøkur teirra kunnu ikki brúka Bygdaleiðir, sum hevur síni føstu steðgipláss í bygdunum, og nøkur teirra krevja eitt vart umhvørvi eisini til og frá verkstaðnum.

Tí verður landsstýrismaðurin spurdur, hvørjar ætlanir eru við flutninginum til og frá Varda Verkstaðnum á Bakka í Vági í framtíðini.

Á tingfundi 3. oktober 2001 var uttan atkvøðugreiðslu samtykt, at fyrispurningurin skal svarast.

Á tingfundi 26. oktober 2001 svaraði Sámal Petur í Grund, landsstýrismaður, fyrispurninginum soleiðis:

Svar:

Ein av tænastunum, sum verkstaðurin í Vági hevur havt leingi, er, at brúkararnir av verkstaðnum kunnu verða heintaðir til arbeiðis og koyrdir heim aftaná arbeiðstíð.

Av tí at útreiðslurnar á verkstaðnum eru hækkaðar, hevur tað verið neyðugt at endurskoða virksemi á verkstaðnum. Leiðslan í Heimarøktini og Serforsorgini hevur tí avgjørt, at niðurleggja koyringina hjá verkstaðnum, sum gevur eina sparing upp á 100.000 kr. Tænastan til brúkaran minkar nakað, og brúkarin skal sjálvur gjalda fyri flutningin. Við eitt sindur av tillaging letur hetta seg gera, tí bygdaleiðir koyra sama strekki.

Víst skal verða á, at játtanin til Varda verkstaðin í Vági ikki er skerd.

Leiðslan í Heimarøktini og Serforsorgini hevur kannað ruturnar hjá Bygdaleiðum í Suðuroynni. Tað vísir seg, at hesar passa rættiliga væl til, at flestu brúkararnir kunnu brúka verandi rutusamband. Tó eru nakrir trupulleikar, sum mugu tillagast betur. Til dømis er tað trupult hjá nøkrum at koma til og frá steðgiplássunum á Tvøroyri og í Vági. Leiðslan í Heimarøktini og Serforsorgini hevur tí heitt á Strandferðsluna (Bygdaleiðir) við ynskjum um nakrar smáar broytingar í steðgistøðum. Væntandi kemur svar ein av fyrstu døgunum. Um Strandferðslan ikki gongur ynskjunum frá leiðsluni um smávegis broytingar á møti, so ætlar leiðslan á Heimarøktini og Serforsorgini at finna aðrar loysnir ella skipanir.

Serstovnadeildin hevur fyrr havt bussar á flestu verkstøðum, og vóru brúkararnir tá heintaðir til arbeiðis. Tað eru nú fleiri ár síðani, at øll koyring í millum bygdir varð skipað á annan hátt, antin við Bygdaleiðum ella við øðrum serskipanum. Somu rationaliseringar eru gjørdar í Tórshavn og á Skálafjørðinum. Tað var trupult í fyrstani, og nógv ónøgd var, men nú gongur tað væl.

Harafturat skal verða víst á, at fleiri stovnar, á røktarheims og serforsorgarøkinum, hava fingið bussar gjøgnum fremmanda fígging, (gávur og innsamling). Tá bussarnir verða gamlir og skulu endurnýggjast, hevur tað verið ein trupulleiki at taka hædd fyri hesi útreiðslu í rakstrinum.

Landsstýrismaðurin er samdur við leiðsluni fyri Heimarøktina og Serforsorgina, at tørvur er á meiri umfatandi koyriskipanum, sum ikki bert veita tænastur fyri ein stovn ella verkstað, men heldur veita tænastur í einum øki, til tey, ið hava tørv á tænastuni, tað verði seg fólk á stovni ella heimabúgvandi.

Tað er altíð trupult at taka tænastur frá fólki, sum tey hava vant seg við. Tað er tí skiljandi at fólk eru ónøgd við at missa nakað, sum tey eru von við. Nevnast kann, at ætlanin ikki er at selja bussin hjá verkstaðnum, men hava hann tøkan sum lið í arbeiðnum á verkstaðnum.

Viðmerkjast skal, at bussurin, sum higartil hevur røkt koyringina, ikki er ein serligur avlamisbussur við lyft, so brúkararnir eru vanir við sjálvir, summir við eitt sindur av hjálp, at fara upp í bussin.

Málið avgreitt.