Handilstiltøk mótvegis UNITA í Angola

A. Upprunauppskot
B. 1. viðgerð
C. Orðaskifti við 1. viðgerð

Ár 2002, 28. februar, legði Anfinn Kallsberg, løgmaður, vegna landsstýrið fram soljóðandi

løgtingslóg um handilstiltøk mótvegis uppreistrarrørsluni UNITA í Angola

§ 1. Virksemi, sum er nevnt í nr. 1 – 6, ella atgerðir, ið hava til endamáls at fremja tílíkt virksemi, kunnu ikki útinnast í Føroyum ella uttanlands av persónum, búsitandi í Føroyum, ella persónum, ið løgfrøðiliga eru búfastir í Føroyum:

1. Beinleiðis ella óbeinleiðis innflutningur av diamantum úr Angola til Føroya, uttan mun til um teir hava uppruna í Angola, tó undantiknir diamantar við upprunaloyvisbrævi, ið er útflýggjað av savningar- og sáttarstjórnini hjá Angola.
2. Søla og veitingar av olju ella oljuúrdráttum til Angola, uttan mun til um upprunin er føroyskur, umvegis aðrar innflutningsleiðir enn tær, ið eru tilskilaðar av stjórnini í Angola, og sum eru fráboðaðar aðalskrivara Sameindu Tjóða samsvarandi samtykt Trygdarráðsins nr. 864 (1993) frá 15. september 1993, t.e. flogvøllirnir í ávikavist Luanda og Katumbela og havnirnar í ávikavist Luanda, Lobito og Namibe, umframt marknarstøðina í Malongo.

 

3. Søla ella veitingar av útgerð til at nýta í námsvinnu ella tænastum hesum viðvíkjandi til persónar ella eindir í Angola, ið ikki eru í ríkisins umsiting samsvarandi samtykt Trygdarráðsins nr. 864 (1993) frá 12. juni 1998 pkt. 12, stk. c.
4. Søla ella veitingar av motorakførum og skipum, ella eykalutir til tílík før, til persónar ella eindir í Angola, ið ikki eru í ríkisins umsiting samsvarandi samtykt Trygdarráðsins nr. 864 (1993) pkt. 2, stk. d.
5. Veitingar av flogførum og eykalutum til flogfør o.l., ella at hava hesi tøk til Angola umvegis aðrar innflutningsleiðir enn nevndu leiðir í nr. 2.
6. Veitingar av flutningstænastum á landi ella sjógvi til persónar ella eindir í Angola, ið ikki eru í ríkisins umsiting.

§ 2. Tað er bannað at selja ella at royna at selja, avhenda, flyta ella á annan hátt at veita til UNITA í Angola:

1. Vápn og hernaðarútbúnað umframt ein og hvønn líknandi útbúnað.
2. Lóður av einum og hvørjum slagi.
3. Hernaðarakfør og hernaðarútgerð.
4. Eykalutir til nevndu lutir í nr. 1-3.

Stk. 2. Útflutningur til Angola av vørum og tænastum, nevnd í stk. 1, kann einans verða framdur lógliga umvegis innflutningsleiðirnar, ásettar í §1, pkt. 2.

§ 3. Persónar, heruppií nevndarlimir í virkjum, ið bróta §§ 1 og 2, verða revsaðir eftir § 110c, stk. 2 í revsilógini við bót, hefti ella undir herðandi umstøðum við fongsli í upp til fýra ár.
Stk. 2. Er brotið framt av partafelagi, lutafelagi, smápartafelagi ella líknandi, kann verða álagt felagnum sum slíkum bót.

§ 4. Hald verður lagt á vinning av virksemi, ið er revsivert sbrt. § 3 í hesi lóg. § 75, stk. 1, 2. pkt., § 76, stk. 1 og stk. 3-5 og § 77, stk. 1 og 3 í revsilógini, galda samsvarandi fyri tí, ið hald verður lagt á sambært hesi grein.

§ 5. Henda lóg kemur í gildi dagin eftir, at hon er kunngjørd.

ALMENNAR VIÐMERKINGAR

Danska uttanríkisráðið hevur um ríkisumboðið í Føroyum heitt á Løgmansskrivstovuna um at skipa so fyri, at Føroyar fremur ávís handilstiltøk í móti uppreistrarrørsluni UNITA í Angola, samsvarandi samtyktunum nr. 864 (1993), nr. 1127 (1997), nr. 1173 (1998) og nr. 1176 (1998) hjá Trygdarráð Sameindu Tjóða, hjálagdar.

Landsstýrið mælir Løgtinginum til at samtykkja løgtingslóg um handilstiltøk mótvegis uppreistrarrørsluni UNITA í Angola.

AVLEIÐINGAR AV UPPSKOTINUM

 SERLIGAR VIÐMERKINGAR

Til §§ 1 og 2: Vegna tess, at uppreistur hevur herjað í Angola í fleiri ár, samstundis sum uppreistrarherurin UNITA ikki enn hevur hildið sínar skyldur, sum eru fevndar av Lusaka samtyktini, og samstundis sum støðan í Angola er ein hóttan í móti altjóða friði, hevur Trygdarráð Sameindu Tjóða samtykt fleiri fyriskipanir, ið limalondini eiga at útinna. Í 1993 varð samtykt at banna innflutningi av olju og vápnum til UNITA. Í 1997 og 1998 vórðu aðrar samtyktir gjørdar, sum hava til endamáls at avmarka og helst steðga virkseminum hjá UNITA.

Til §§ 3, 4 og 5: Hetta eru almennar ásetingar, ið verða nýttar í øllum tílíkum løgtingslógum samsvarandi samtyktum Trygdarráði Sameindu Tjóða.

Skjalayvirlit:

1. United Nations s/res/864 (1993), Security Council Distr.: General 15. september 1993 Resolution 864 (1993
2. United Nations s/res/1127 (1997) 28. August 1997 Resolution 1127 (1997)
3. United nations s/res/1173 (1998) 12. June 1998 Resolution 1173 (1998)
4. United nations s/res/1176 (1998) 24 June 1998 Resolution 1176 (1998)

1. viðgerð 5. mars 2002. Tingmálini nr. 78, 79 og 80/2001 vórðu viðgjørd undir einum og øll beind í uttanlandsnevndina.

Málið fall burtur sbr. stýrisskipanarlógini § 15, stk. 3, tí at løgtingsval varð útskrivað 18. mars 2002 til at verða 30. apríl 2002, og málið ikki var liðugt viðgjørt á tingi fyri valið.