Fyri lán er tann meginreglan galdandi, at rentur og kurstap verða førd til tað árið, tær eru roknaðar fyri, tvs. at rentur og kurstap verða tíðaravmarkað. Tíðaravmarking merkir, at um renta verður goldin í 1999 fyri tíðarskeiðið 1998, verður rentan tikin við í roknskapin fyri 1998. Rentuútreiðslurnar er sostatt perioduseraðar rentur, tvs. tær sum hoyra til árið.

Lánið, sum landsstýrið hevur frá donsku stjórnini, liggur nú fast sum annuitetslán yvir 20 ár við 5% í rentu pro anno. Í 1999 verður tað 199,7 mió. kr.

Lánsbrøvini, sum landsstýrið hevur útgivið, ganga út í desember 1999. Hóast ein partur av teimum ella øll verða endurfíggjað við nýggjum lánsbrøvum, so liggur rentuútreiðslur landskassans í meira fastari legu, enn tær hava gjørt árini frammanundan. Lánsbrævaskuldin er 570 mió. kr. Í omanfyristandandi meting verður roknað við at tann parturin av skuldini verður uml. 300 mió. kr. minni frá desember 1999.

Sambært § 2-4 í løgtingslóg um innlán í Landsbankan og lán úr Landsbankanum kann landskassin ikki standa í nettoskuld til landsbankan. Sambært § 5 í somu lóg ásetir landsbankin rentu fyri innlán og útlán. Rentuáseting má tó ikki merkja rentutap fyri landsbankan. Sum er verður nettoáogn hjá landskassanum í landsbankanum rentað við meðalrentu pro anno fyri fíggjarplaseringar hjá landsbankanum, frádrigið 1%.

Óvissan í at áseta rentuinntøkurnar stavar frá tveimum viðurskiftum, a) gongdini í inn- og útgjaldingum landskassans, og b) gongdini í altjóða rentustigi, sum hevur verið ófriðarligt í eina tíð. Metingarnar um rentuinntøkurnar eru tí nakað óvissar.

Landskassans rentuinntøkur frá landsbankanum verða væntandi 35 mió. kr. í 1999.

Torført er at meta, hvussu nógv verður goldið inn á skuld til landskassan.

Rentur av útláni v.m. 5.000

Aðrar rentuinntøkur 1.000

Tilsamans 6.000

Viðmerkjast skal, at hesar inntøkur áður hava verið á somu høvuðskonto sum rentur av innistandandi.

Arbeitt verður við 4 sløgum av rentum í skattaskipanini. Hesi eru:

• Endurgjaldsrenta
• Eykarenta
• Eykagjaldsrenta
• Morarenta

Rentuinntøka av útláni verður inntøkuførd, tá goldið verður.

Landsbanki Føroya er stovnsettur við serlóg, løgtingslóg nr. 57 frá 2. oktober 1978 um Landsbanka Føroya. Í løgtingslógini um landsbankan verður ásett hvussu stovnsfæ bankans verður útvegað, eins og stýriskipan og virkisøki bankans er ásett í lógini. Av tí at Landsbankin er skipaður við løgtingslóg, og soleiðis sum stjórnarviðurskifti bankans eru ásett í lógini, er bankin at meta sum ein serligur fyrisitingarligur myndugleiki, uttanfyri vanligu fyrisitingarligu skipanina. Hetta merkir, at landsstýrismaðurin mótvegis Landsbankanum ikki hevur tær instruktiónsheimildirnar, sum hann vanliga hevur mótvegis stovnum, sum eru beinleiðis undir landsstýrismanninum. Serligir fyrisitingarligir myndugleikar eru vanliga heldur ikki við á fíggjarlógini.

Stórsta broytingin við ávirkan á yvirskot landsbankans 1999 verður væntandi, at samsýningin fyri at røkja lán landskassans fer at minka. Útgoldna yvirskótið kann minka við einari mió. kr. av hesum.

Sambært § 19 í lóg 116 frá 1936 um Danmarks Nationalbank fer yvirskot hjá bankanum til statin í tann mun yvirskotið ikki verður sett í tiltaksgrunn ella serstakar tryggingargrunnar.

Av tí at bankin tekur upp kursjavnan av lánsbrøvum, gjaldoyra, gulli v. m. pr. 31. desembur á rakstrarúrslitið, er ringt at meta um stødd av upphædd, sum goldin verður til statin, føroyska landskassan og grønlendska landskassan.

Føroyski landskassin fær part av yvirskotsveiting frá nationalbankanum til statin. Partur landskassans verður roknaður sum lutfallið millum tað føroyska seðlaumfarið og samlaða seðlaumfarið í ríkinum ultimo árið.