Við avtaluni frá 10. juni 1998 millum Ríkisstjórn Danmarkar og Føroya landsstýri varð heildarveitingin ásett til 932 mió. kr. fyri árini 1999, 2000 og 2001 óbroytt uppá 1999-støðið realt. Heildarveitingin hækkar við sama prosenti, sum rakstrarútreiðslurnar hjá danska statinum í meðal vera hækkaðar. Spurningurin um heildarveitingina fyri árið 2002 og framyvir verður tikin upp til umrøðu undir samráðingunum millum ríkisstjórnin og landsstýrið um føroyskt fullveldi og tí verður eingin upphædd sett fyri ár 2002.

Kontoin "Endurgjøld" er endurgjald úr ríkiskassanum fyri eftirlønir til tænastumenn o.o., sum sett hava verið í føroyska fólkaskúlanum. Útreiðslurnar til læraraeftirlønir eru bókaðar á høvuðskonto 7.23.2.07. Til 30. juni 1997 hevur ríkiskassin endurrindað 80% av øllum útreiðslunum til læraraeftirlønir, men frá 1. juli 1997 verður endurrindað eftir L. nr. 474 frá 10. juni 1997 "Lov om ophævelse af lov om tjenestemænd m.fl. i folkeskolen på Færøerne". Eftir lógini verður skilnaður gjørdur millum eftirlønaraldur, sum vunnin er fyri og eftir 31. desember 1987. Frá 1. juli 1997 endurrindar ríkiskassin 80% av teimum eftirlønarútreiðslum, sum eru fyri eftirlønarrætt, sum vunnin er fyri 31. desember 1987. Útreiðslurnar til læraraeftirlønir vaksa støðugt, men lutfallið millum útreiðslurnar til læraraeftirlønir og tað, ríkiskassin endurrindar, fer at minka ár fyri ár.