3.15.1.01. Landsskattakærunevndin (Rakstrarjáttan)

Endamálið er at viðgera og taka avgerð um kærur um skattaálíkning sambært kap. 9 í løgtingslóg um landsskatt og kommunuskatt.

3.15.1.02. Kommunalar skattakærunevndir (Rakstrarjáttan)

Sambært § 12 í løgtingslóg nr. 169 frá 30. desember 1997 um Toll- og Skattafyrisiting verður landið býtt upp í 7 skattakæruøkir, har kommununar í økinum velja hvør sína skattakærunevnd til at viðgera kærur um álíkningina frá borgarunum í tí øki, tær umfata.

3.15.1.04. Toll- og Skattstova Føroya (Rakstrarjáttan)

Til tess at lýsa virkisgrundarlagið undir stovninum er yvirlit gjørt yvir, hvørjar lógir og kunngerðir talan er um. Yvirlitið vísir, hvar Líkningarráð Føroya hevur sjálvstøðugar heimildir, og hvørjar lógir og kunngerðir Toll- og Skattstovan lutvíst hevur skyldu at røkja. Harumframt er talan um ymsar millumlandasáttmálar.

Lóg um innflutning og sølu av rúsdrekka

Lóg um sjúkur, sum fiskur, skeljadýr og krabbadýr hava

Lóg um íløt til øl, mineralvatn og lidnar leskidrykkir

Sjúkufyribyrging av dýrum

Bekæmpelse af smitsomme plantesygdomme og skadedyr (kunngerð)

• Fríhandilsavtalur:

• Tvískattasáttmálar
• GATT-sáttmálin (WTO)
• Bekendtgørelse af aftale med Finland, Island, Norge, Sverige og Danmark om gensidig bistand i toldsager

Stovnurin skal umsita virkisgrundarlagið soleiðis, at borgarar og virkir gjalda tað, tey skulu, hvørki meira ella minni, og at hetta verður gjørt so væl og so bíliga, sum til ber. Stovnurin skal somuleiðis síggja til, at borgarar og virkir skilja fyrisitingina, og at tey verða rættvíst viðgjørd.

Til tess at røkja virkisgrundarlagið so væl sum til ber, og við tí játtan, stovninum er tillutað, hevur stjórnin sett sær fyri nøkur mál, sum støðugt verður arbeitt við at fremja. Arbeitt verður fram ímóti at:

• Fáa støðugt meiri av skafti
• Gera arbeiðið alsamt betur

At náa hesi mál, hevur stjórnin sett sær serligar uppgávur fyri. Hesar eru í stuttum:

• Einfaldari reglur (lógar- og regluverk)
• Automatiseringar (sjálvuppgávan og tollavgreiðslur)
• Arbeiðsorkan skal verða bend ímóti eftirlitsuppgávum
• Útbúgving
• Endurskoðan av starvslýsingum

Toll- og Skattstovan er skipað í tvær eindir.

Onnur eindin, sum er Stýrið, tekur sær av ráðlegging, stýring, eftirliti og menning, tekur sær av sambandinum við Landsstýrið og Líkningarráðið og virkar sum ráðgevi hjá økjunum í fakligum spurningum um toll, skatt, meirvirðisgjalsgjald og øðrum avgjøldum og um eftirlit. Stýrið er skipað við stjórn, stjórnarskrivstovu og fýra deildum; eftirlitsdeild, lógardeild, umsitingardeild og menningardeild.

Hin eindin, sum er skipað í seks økisskrivstovur, tekur sær av øllum rakstrinum. Økisskrivstovurnar hava fyri sítt geografiska øki ábyrgd av vegleiðing, álíkning, innkrevjing og eftirliti mótvegis borgarum og virkjum.

Í sambandi við skipan av Fíggjarmálastýrinum er innheintingin – við gildi frá 1. mai 1998 flutt frá Føroya Gjaldstovu til Toll- og Skattstovu Føroya sum eitt sjálvstøðugt øki. Hetta førir við sær, at ein játtan uppá 5.000.000 kr. verður flutt frá Gjaldstovuni til Toll- og skattstovuna. Tí hesar broyttu upphæddir í mun til 1998.

Játtan fyri 1998. 48.000.000 kr.

Niðurskurður í mun til 1998 500.000 kr.

Rest 47.500.000 kr.

Flutt frá FGJ 5.000.000 kr.

Íalt 52.500.000 kr.

3.15.1.07. Føroya gjaldstova (Rakstrarjáttan)

Játtanin verður nýtt at reka landsstovnin Føroya gjaldstovu, sum er skipað undir landsstýrinum. Gjaldstovan førir roknskap yvir játtanirnar á fíggjarlógini og førir m.a. eisini roknskap yvir ogn og skuld landskassans. Gjaldstovan stendur fyri inn- og útgjaldingum landskassans og hevur um hendi ein part av almennu lønaravgreiðslunum. Broytingar eru gjørdar á økinum innan fíggjarmálastýri, og er innkrevjingaruppgávan flutt frá gjaldstovuni til toll- og skattstovuna.

Ábyrgdarøkið kann nátúrligt liðast sundur í hesar høvuðsuppgávur:

Landsins bókhald - herundir menning, viðlíkahald og rakstur av landsins roknskaparskipan. FGJ førir í dag bókhald fyri tær flestu høvuðskontiirnar á fíggjarlógini og heldur roknskap við ogn og skuld landskassans. Stovnurin umsitur eisini fleiri almenn lán og avgreiðir allar allar útgjaldingar úr landskassanum og ger landsroknskapin.

Stýring av gjaldføri landskassans - gjaldstovan hevur um hendi allar inn- og útgjaldingar landskassans vegna og skal ætla um gjaldførið í fíggjarárinum.

Lønarútgjalding - fevnir um eina miðsavnaða skipan til útgjalding av almennum lønum. (Tað eru í dag fleiri aðrar lønastovur innan tað almenna). Í sambandi við, at felags lønarskipanin verður tikin í nýtslu í 1999, so verða uppgávurnar á hesum økinum eisini menning, viðlíkahald og rakstur av felags lønarskipanini.

Stovnurin er ikki skipaður við lóg, men partar av virkseminum eru ásettir við lóg.

Í kunngerð nr. 114 frá 22. august hevur landsstýrið ásett øll tey týdningarmestu viðurskiftini í sambandi við roknskaparverk landsins t.d. hvønn roknskaparhaldið fevnir umhvørjar uppgávur roknskaparhald landsins skal loysa, hvussu hetta verður fyriskipað og hvørji krøv verða sett til roknskaparførslu.

Almennar viðmerkingar:

Útreiðslur: Av tí at innkrevjingarfunktiónin er flutt til toll- og skattstovuna, so eru tølini fyri 1998 og 1999 ikki heilt samanbarlig. Nettoútreiðsluparturin hjá innkrevjingardeilini av fíggjarætlanini fyri 1998 er umleið 5 mió. kr.

Stovnurin fór saman við landsstýrinum í 1994 í holt við eina umlegging av øllum virkisøki stovnsins á økjunum bygnaður, EDV og formlig viðurskifti. Orsaka av vantandi arbeiðsorku, so eru tíðarætlanirnar longdar, og roknað verður ikki við, at arbeiðið verður endaliga liðugt fyrr enn í ár 2000. Fíggjarmálastýrið heldur, at neyðugt er at styrkja roknskaparfunktiónina innan tað almenna, so at lætt verður um støðuga arbeiðstrýstið, ið liggur á stovninum, tí hevur fíggjarmálastýrið hækkað játtanina til stovnin, so at talið á starvsfólkum verður umleið 32.

Verksetanin av nýggju lønarskipanini kemur at merkja, at setast skal ein persónur afturat at umsita sjálva skipanina og ein persónur í ár 2000 at leiðbeina og gera relgur fyri nýtsluna av skipanini.

Fíggjarstýringarskipanin: Fíggjarstýringarverkætlanin er um at verða liðugt innførd. Skipanin var endaliga flýggjað landsstýrinum í vár sambært avtalu millum partarnar og eru nú bert smærri ting at fáa upp á pláss. Málið er nú at arbeiða við EDV-trygdarspurninginum. Settar eru 250 túsund kr. til hetta endamálið í 1999, og roknað verður við somu upphædd í ár 2000.

Lønarskipan: Arbeitt verður í løtuni at kravfesta nýggju lønarskipanina.

3.15.1.10. Nýggj fíggjarstýring (Rakstrarjáttan)

Seinastu árini hevur verið arbeitt við at innføra nýggjar EDV-skipanir á arbeiðsøkinum hjá Føroya Gjaldstovu. Skipanirnar verða innførdar á økjunum:

• Innkrevjing (innkrevjingarskipanin (DEMM), varð alment tikin í nýtslu 11. mars 1996). Skipanin er karmur um almennu innkrevjingina. Henda partsverkætlanin varð skipað í tveimum. 2. táttur, sum millum annað snýr seg um eina lættari handtering av mótrokningaruppgávuni, er ikki byrjaður enn. Av tí at ár 2000- spurningurin krevur so nógv í løtuni, bæði hjá myndugleikum og EDV-útvegararum, so er óvist, um uppgávan verður loyst fyri ár 2000.
• Fíggjarstýring (fíggjarstýringarskipanin (FSL), varð alment tikin í nýtslu 1. januar 1997 og verkætlanin er formliga liðug í 1998.
• Lønarumsiting: 3. partur av samlaðu verkæltanini var at innføra eina nýggja lønarskipan. Henda lønarskipanin verður væntandi liðug at taka í nýtslu í á heysti 1999.

Felagsheitið fyri skipanirnar, sum gjaldstovan fer at umsita, er: Búskaparskipanir landsins.

Verkætlanin byrjaði í 1994 og endar væntandi í 2000.

3.15.1.13. Búskaparráðið (Rakstrarjáttan)

Ætlanin við búskaparráðnum er, at tað skal gera regluligar frágreiðingar frá føroyskum búskaparfrøðingum um gongdina í føroyska búskapinum, um tey búskaparligu útlitini, og um hvørji tiltøk eiga at verða sett í verk. Ráðið er óheft av Landsstýrinum. Fróðskaparsetur Føroya mælir til, hvørjir limirnir skulu vera.

Lógargrundarlagið er løgtingslóg nr. 120 frá 1995: løgtingslóg um búskaparráð, við seinni broytingum.

Sjey limir eru í ráðnum. Av teimum skulu tríggir vera búskaparfrøðingar, og hinir fýra limirnir skulu hava serkunnleika á umráðandi búskaparøkjum. Teir skulu vita væl um t.d. fiskivinnu, peningastovnsvirksemi, handilsvinnu og arbeiðsmarknaðarviðurskifti. Ráðið hevur til hetta sett ein skrivari, sum er útbúgvin búskaparfrøðingur.

3.15.1.14. Føroya Kærustovnur (Rakstrarjáttan)

Lógargrundarlagið fyri Føroya Kærustovni, sum er kærunevndirnar í almanna-, og skatta-, toll- og mvg- málum og skrivstovu teirra, finst í løgtingslóg nr. 47 frá 23. mars 1993 um kærunevnd í almannamálum, løgtingslóg nr. 169 frá 30. desember 1997 um toll- og skattafyrisiting (§§ 3 og 22), løgtingslóg nr. 136 frá 8. september 1992 um meirvirðisgjald (35), løgtingslóg nr. 121 frá 23. desember 1991 um toll (§19) og avgerð frá 1997 tikin av landsstýrismanninum í fíggjarmálaum at leggja skrivstovurnar hjá kærunevndunum í skatta-, toll- og mvg-málum til almennan kærustovn.

Avgerðir kærunevndarinnar kunnu ikki leggjast fyri annan umsitingarligan myndugleika. Avgerðirnar kunnu tó skjótast inn fyri rættin.

3.15.1.16. Valuta- og prísráð (Rakstrarjáttan)

Valuta- og prísráðið er avtikið í 1997.

3.15.2.01. Hagstova Føroya (Rakstrarjáttan)

Lógargrundarlag stovnsins er løgtingslóg nr. 33 frá 7. mai 1991 um Hagstovu Føroya. Sambært hesi lóg er Hagstovan ein sjálvstøðugur stovnur við einum stjóra, og er høvuðsmyndugleiki fyri hagfrøðiligum virksemi í Føroyum. Stovnurin skal: