3.18.1.01. Tænastumannaeftirlønir (Lógarbundin játtan)

Lógargrundarlagið undir játtanini er løgtingslóg nr. 32. frá 5. juni 1971 um tænastumannaeftirlønir. Fólk, sum fáa eftirløn eftir hesi lóg, eru: Tænastumenn, sum eru farnir frá fyri aldur, sjúku ella av øðrum óvæntaðum ávum, sum teir ikki hava vald á, og sum ikki kunnu verða kannaðar teimum. Eftirsitandi hjúnafelagar hjá tænastumonnum ella eftirløntum tænastumonnum. Eftirsitandi børn hjá tænastumonnum og tænastumenn, sum fáa barnaískoyti, um teir hava børn undir 18 ár, tá ið teir tey fara frá.

Eftirløn verður roknað eftir avtalu, sum er gjørd millum Landsstýrið og Tænastumannafelagið við grundarlagi í lógini, sum er nevnd omanfyri. Í september 1997 fingu 62 persónar tænastumannaeftirløn (íroknað hjúnafelagseftirløn og barnaeftirløn). Í august 1998 fingu 77 persónar tænastumannaeftirløn (íroknað hjúnarfelagseftirløn og barnaeftirløn)

Sundurgreinað ætlan

3.18.2.01. Eftirlønir (Lógarbundin játtan)

Eftirlønir, sum sambært samtykt Landsstýrisins og fíggjarnevndarinnar verða veittar teimum, sum vóru í starvi hjá tí almenna 1. apríl 1949, og sum eftir 30 ára aldur hava starvast í minsta lagi 15 ár hjá tí almenna og fara úr starvi fyri aldur ella sjúku ella eftirsitandi hjúnarfelagum teirra. Eftirlønin verður roknað sum 2/3 av tænastumannaeftirløn. Í løtuni fáa 8 persónar eftirløn á hesi konto.

Viðmerkt kann verða, at fólk, sum fáa eftirløn eftir hesi reglu, og sum starvast á stovnum við egnari lønarútgjalding, t.d. Telefonverkinum, fáa eftirlønina goldnað frá stovninum.

3.18.2.04. Danskar eftirlønir (Lógarbundin játtan)

Endurgjald til ríkiskassan sambært avtalu dagf. 6. februar 1981 við ískoyti dagf. 10.mai 1990 um eftirlønarbýti hjá ávikavist Landsstýrinum og ríkiskassanum. Eftir hesi avtalu rindar statskassin eftirløn til statstænastumenn og onnur, sum hava tænastumannalíknandi eftirlønarskipan, hvørs øki heimastýrið hevur yvirtikið, og skal Landsstýrið síðani rinda statinum aftur tað, sum er vunnið í eftirlønarrætti eftir yvirtøkuna.

3.18.2.07. Eftirløn landsstýrismanna (Lógarbundin játtan)

Sæmbært greinini verður eftirløn goldin landsstýrismonnum, ið hava rætt til eftirløn sambært lóg nr. 10 frá 8. januar 1993 um løn og eftirløn landsstýrismanna. Eftirløn til løgtingsmenn hevur eisini verið goldin av hesi konto, men er nú flutt yvir undir § 1, løgtingsmenn, lønir o.a.

3.18.3.01. Burðarfarloyvi (Rakstrarjáttan)

Í semjuni, sum varð gjørd við tjúgu fakfeløg 9. apríl 1995, er avtalað, at frá 1. januar 1996 verður felags barnsburðargrunnur settur á stovn. Hetta verður gjørt soleiðis, at 0,8 % av lønarpartinum hjá øllum almennum stovnum verða sett á eina felagskonto at gjalda starvsfólki, sum kemur í staðin fyri tær starvskvinnur, sum eru í barnsburðarfarloyvi. Grunnurin verður settur á stovn fyri at forða fyri, at summir stovnar verða raktir serliga hart, tá ið starvskvinna fer í barnsburðarfarloyvi.

Talan er um lønarforskot, sum tænastumenn hava rætt til sambært lóg § 41 í tænastumannalógini, og sum verður veitt sum lán. Forskotini hava áður bert verið bókað á status í roknskapi landsins.