5.35.1.01. Sjóvinnufyrisiting og Skráseting Føroya (Rakstrarjáttan)

Sjóvinnufyrisitingin, herundir Skráseting Føroya, er fyrisitingarliga skipað undir landsstýrismanninum í fiskivinnumálum í Fiskimálastýrinum. Høvuðsmálsetningurin hjá Sjóvinnuumsitingini er at veita holla ráðgeving til tess at tryggja, at millumtjóða sáttmálar og føroysk lóggáva í felagsmálum og sermálum verða framd, og at eftirlit er við hesum reglum til tess at verja mannalív og ognir á sjónum og at haldgóð trygd er fyri, at tey, sum starvast í hesi vinnu, hava neyðuga førleikan.

Høvuðssetningurin hjá Skipaskrásetingini er at umsita føroyska lóggávu í skipaskráseting og Føroya altjóða skipaskráseting, sum eru sermál, og at veita Landsstýri, Løgtingi og borgarum stuðul og ráðgeving í øllum skrásetingarviðurskiftum.

Høvuðsmálsetningurin hjá Felagsskrásetingini er at umsita føroyska lóggávu í felagsskráseting, sum er sermál og felagsmál, og at veita Landsstýri, Løgtingi og borgarum stuðul og ráðgeving í øllum skrásetingarviðurskiftum.

Í 1999 er játtanin hækkað við 1 mió. kr. sett av til fyrireikingar í samband við yvirtøku av skipaeftirlitinum, herundir ta felagslóggávu, sum í dag er felagsmál. Skipaeftirlitið verður fyrisitingarliga skipað í Fiskimálastýrinum saman við Sjóvinnufyrisitingini.

Arbeiðsuppgávurnar eru beinleiðis avleiðingar av ásetingum í løgtingslógum ella ríkislógum, sum eru galdandi fyri Føroyar, og sum binda umsitingina til at veita eina tænastu, sum samsvarar við tørvin hjá vinnuni og borgarum.

Flestu mál eru sermál og fevna um sjóvinnulógina, manningarlógina, mynstringarlógina, sjómanslógina og tann parturin, sum er felagsmál, serstakliga tekniskar fyriskipanir sambært lóg um skipatrygd, sum Sjóvinnufyrisitingin og Skipaeftirlitið hava ábyrgdina av, grundað á samstarvsavtalu millum Landsstýrið og Søfartsstyrelsen. Sjóvinnufyrisitingin hevur umsjón við øllum sjóvinnu- og manningarviðurskiftum, herímillum sjóvinnubrøvum, førleikakrøvum, trygdarskeiðum, manningaráseting, undantøkum í manningarlógini, mynstringareftirliti og umsjón við sjómanslógini, herímillum læknakanningum av sjómonnum, kost- og heilsuviðurskiftum umborð, siglingarbókum, mynstringarlistum v.m. Sjóvinnufyrisitingin er kærustaður við uppgerð skiparans og í sambandi við læknakanningar.

Sjóvinnufyrisitingin er við á altjóða sjóvinnufundum, sum eru týdningarmiklir fyri Føroyar. Harafturat er Sjóvinnufyrisitingin við í norðurlendskum samstarvi og í donskum undirnevndum um teknisk krøv og tryggleika á sjónum, og er við á árligu fundunum hjá norðurlendsku sjóvinnustjórunum.

Skipaskrásetingin umsitur løgtingslógirnar um skipaskráseting og løgtingslógina um Føroya altjóða skipaskrá (FAS).

Umsitingarligu uppgávurnar eru at skráseta nýggj skip og skip flutt úr øðrum skrásetingum, skráseta bátar í Streymoyar sýslu, pantirættindi v.m. og at hava neyvt eftirlit við, um eigarar/feløg lúka øll skrásetingarkrøv.

Skrásetingin skal eisini umsita reglurnar um dupultskráseting (bareboat-skráseting), sum komu í gildi í juni 1997. Henda skipan merkir, at eitt føroyskt skip, sum verður leigað út til ein útlendskan reiðara í eina ávísa tíð og kemur undir fremmant flagg, kann framvegis vera skrásett í Føroyum. Hinvegin, um eitt útlendskt skip verður leigað til Føroyar í eina ávísa tíð, kann hetta eisini vera skrásett í tí landinum, sum tað kemur frá.

Skráseting Føroya umsitur parta- og smápartafelagslógina, lógina um vinnurekandi grunnar, lógina um bankar og sparikassar, ársroknskaparlógina v.m., sum eru ríkislógir settar í gildi fyri Føroyar frá 1. januar 1994.

Umsitingarligu uppgávurnar eru at skráseta nýggj feløg ella broytingar.

Skráseting Føroya skal hava eftirlit við, um feløgini lúka øll krøv, sum verða sett til teirra felagshátt, herímillum tíðarfreistir at senda inn ársroknskapir og aðrar kravdar upplýsingar.

Nýggju lógirnar geva fólki møguleika at biðja um upplýsingar úr skrásetingini, og av hesum hevur skrásetingin ávísar inntøkur.

Skráseting Føroya skal, í samráði við vinnuna, geva Landsstýrinum ráð, tá ið nýggjar ríkislógir ella broytingar skulu galda fyri Føroyar.

Undirkonto 4.35.1.01.21. verður nýtt til rakstur av Trygdarmiðstøð fyri sjómenn.

Studningur til tey tíggju bjargingarfeløgini í Føroyum verður býttur millum feløgini, treytað av, at tey føra roknskap/uppgerð yvir virksemið hjá feløgunum. Játtanin er ætlað til útgerð.

FAS-endurgjald verður latið sambært § 63 A í løgtingslóg nr. 86 frá 1. september 1983 um landsskatt og kommunuskatt.

Løntakarar í FAS-skipanini eru undir avmarkaðari skattskyldu í Føroyum, har nettoinntøkan verður skattað við 35%. Arbeiðsgevarar, sum koma undir skipanina, skulu hava ein prosentpart av teimum útgoldnu lønunum endurgoldnar. Parturin er í løtuni 28%, og verður endurgjaldið býtt lutfalsliga millum landið og kommunurnar.

5.35.1.10. Trygdarmiðstøð (Løgujáttan)