6.32.1.01. Oljumáladeildin (Rakstrarjáttan)

Oljumáladeildin er deild í Vinnumálastýrinum (§ 6.11.1.06.). Oljumáladeildin skal á kolvetnisøkinum umsita mál sambært galdandi lóggávu, t.e. løgtingslóg um kolvetnisvirksemi umframt kunngerðir um veiting av forkanningarloyvum. og reglugerðum v.m. Oljumáladeildin samskipar alt arbeiðið, ið hevur beinleiðis við málsøkið at gera. Oljumáladeildin er skrivstova hjá Oljuráðleggingarnevndini, og útreiðslurnar í sambandi við arbeiðið hjá Oljuráðleggingar-nevndini eru tiknar við á hesum rakstrarstað.

Ætlanin er at seta 1.útbjóðingarumfarið í verk í 1999. Løgtingið skal sambært løgtingslógini um kolvetisvirksemi samtykkja útbjóðingarøkini og -treytirnar við lóg. Eftir tað er útbjóðingarumfarið býtt upp í fylgjandi stig. 1. Útboð, 2. Marknaðarføring, 3. Móttøka av umsóknum, 4. Viðgerð av umsóknum, 5. Samráðingar við oljufeløg, 6. Støðutakan.

Nakað av serligum útreiðslum er knýtt til eitt útbjóðingarumfar. T.d. verður tað væntandi neyðugt hjá Vinnumálastýrinum og Jarðfrøðisavninum at keypa væl av jarðfrøðiligari hjálp í sambandi við viðgerðina av umsóknum í 1. útbjóðingarumfari. Afturat hesum koma útreiðslur til konsulenthjálp, marknaðarføring o.l. Av tí at tað er torført frammanundan at meta um játtanartørvin til slíkar útreiðslur, og er ætlanin seinni at biðja um eina eykajáttan, tá ætlanirnar um 1. útbjóðingarumfar eru ítøkiligar. Vinnumálastýrið hevur leysliga mett henda tørvin til umleið 2 mió. kr.