8.22.1.01 Rentustudningur til húsabygging (Lógarbundin játtan)

Sambært løgtingslóg nr. 118 frá 18. juni 1997 um rentustudning til samansparing til húsabygging, verða latin 3% um árið í rentustudningi til samansparing ið er ætlað til sethúsa- íbúðabygging ella keyp, ella til at keypa grundstykki til sethús- ella íbúðabygging.

Innskot kann í mesta lagi vera kr. 30.000 í einum kalendaraári. Rentustudningur verður veittur í longsta lagi í 8 ár.

Innistandandi í peningastovnum til húsabygging eru uml. 41 mió kr. Av hesum hava uml. 16 mió. kr. rokkið áramálinum fyri rentustuðli.

Húsalánsgrunnurin umsitir skipanina.

Eingin játtan verður í 1999.

8.39.1.01. Semingsmannaskipanin (Rakstrarjáttan)

Endamálið við játtanini er at fíggja semingsmannaskipanina á privata arbeiðsmarknaðinum, smb. Lóg nr. 86 frá 31. mars 1928 har ásett er: "Udgifter til Lønninger, Kontorhold, m.v. udredes af Staten ved bevilling paa de aarlige Finanslove."

Semingsmenn verða valdir fyri 3 ár í senn.

Viðmerking: Játtanin er flutt á aðra grein.

8.39.1.07. Arbeiðseftirlitið (Rakstrarjáttan)

Arbeiðseftirlitið er stovnur undir vinnumálastýrinum og umsitur m.a. føroysku lóggávuna um arbeiðsumhvørvi við tilhoyrandi kunngerðum, sum fyrisettar eru við heimild í Ll. nr. 58 frá 24. mai 1974 um arbeiðaravernd, og umfatar hetta eisini donsku kunngerðirnar um arbeiðsumhvørvi, ið eru settar í gildi sambært § 17, stk. 3 í somu lóg, m.a. kunngerðirnar um kemisk evni og tilfar, teknisk hjálpartól og persónliga verndarútgerð v.m..

Arbeiðseftirlitið umsitur Ll. nr. 51 frá 28. apríl 1992 um kavaravinnu við tilhoyrandi kunngerðum og útskrivar vinnubrøv til kavarar, ið lúka tær ásettu treytirnar í hesum sambandi. Føroyska lóggávan innan hetta øki er stórt sæð á sama støði sum líknandi lóggáva í Danmark og hinum norðurlondum.

Arbeiðseftirlitið umsitur, saman við Landsstýrinum og Løgregluni, Ll. nr. 68 frá 1. apríl 1912 um spreingievni við tilhoyrandi reglum, t.v.s. at loyvi til framleiðslu/innflutning og keyp/nýtslu av spreingievni verða givin av ávikavist Landsstýrinum og Løgregluni, meðan sýn og eftirlit við spreingiarbeiði og spreingievnisgoymslum verða gjørd av Arbeiðseftirlitinum.

Stovnurin fæst við fylgjandi uppgávur:

- Ráðgeving og leiðbeining til virkir.

- Regluligari eftirlitsvitjan á virkjum og arbeiðsplássum.

- Lógarbundin sýn og eftirlit við vandamiklum arbeiðstólum og -maskinum.

- Lógarbundnari útbúgving av trygdarskipanini á virkjum.

- Lógarbundin førleikaskeið fyri trukk- og kranførarar.

- Góðkenning av innrætningum av virkjum og arbeiðsgongdum.

- Arbeiðshygiejniskar mátingar av inniklima og útgreiningum av hesum.

- Upplýsandi og fyribyrgjandi tiltøk.