Eykajáttanarløgtingslóg fyri februar 2002

A. Upprunauppskot
B. 1. viðgerð
C. Orðaskifti við 1. viðgerð
D. Álit
E. 2. viðgerð
F. Orðaskifti við 2. viðgerð

Ár 2002, 26. februar, legði Kristian Magnussen, løgtingsmaður, vegna Javnaðarflokkin fram soljóðandi

Uppskot

til

Í kreppuárunum var Landssjúkrahúsið fyri ógvusligum sparingum og er enn ikki komið upp á fíggjarliga støðið, ið tað var á áðrenn kreppuna. Hetta hevur m.a. ført við sær, at umstøðurnar hjá sjúklingum og starvsfólki, vegna sparingar, ikki hava verið nøktandi seinastu árini. Vit uppliva í dag, at deildir eru stongdar stóran part av árinum, búfólk á pensionatinum verða koyrd úr heimi sínum til høgtíðir, starvsfólk verða ár aftaná ár hótt við uppsagnum, og bíðitíðin til ávísar viðgerðir er longri, enn rímiligt er.

Bygningarnir eru niðurslitnir og forfalla, og ávísur útbúnaður er so vánaligur, at hann hvørki kann bjóðast sjúklingum ella starvsfólki. Seinastu árini er tó nakað av vend komið í. Nýggi bygningurin byrjar at taka skap og Løgtingið hevur veitt eykajáttanir fyri at framskunda eina útskifting av medicotekniskum tólum og sjúkrabilum.

Miðan februar í ár vóru limirnir í Løgtingsins fíggjar- og trivnaðarnevnd á vitjan á landsjúkrahúsinum. Har bleiv greitt frá um røkt og rehabilitering, og at enda vóru limirnir og vitjaði ávísar deildir. Tað kendist ikki sørt pínligt at síggja, hvussu vánaligar umstøðurnar eru. Tað, sum serliga var tikið fram sum dømi av starvsfólkum, vóru vánaligu sengurnar, ið vit bjóða sjúlingum at liggja í. Hesar eru gamlar og slitnar, og nógvar av teimum virka ikki sum tær skulu. Hetta er til stóran ampa fyri sjúkingin og fyri starvsfólki.

Nógv er tosað um góða samfelagsbúskapin seinastu árini, og um hvussu nógv av yvirskotinum á løgtingsfíggjarlógini, ið er sett inn í landsbankan. Á landssjúkrahúsinum eru 230 seingjapláss, og sjúklingarnir liggja í gomlum útslitnum sengrum, harav nógvar eru í ólagi. Ein góð sjúkrahússong kostar umleið 20.000 kr.

Heitt verður á Løgtingið um at taka undir við uppskotinum og veita landssjúkrahúsinum eina eykajáttan upp á 4 mió til útskiftan av sengrum. Fyri hesa upphædd kunnu í øllum førum 200 sengur útvegast. 

A. Yvirlit

Játtanaryvirlit

B. Játtanir

 Viðmerking:

Játtanin skal nýtast til at keypa nýggjar sengur til Landssjúkrahúsið.

Sundurgreinað ætlan

1. viðgerð 28. februar 2002. Tingmálini 1-5 og 1-6/2001 vórðu viðgjørd undir einum. Bæði beind í fíggjarnevndina, sum tann 11. mars 2002 legði fram soljóðandi

Á l i t

Javnaðarflokkurin hevur lagt málið fram tann 26. februar 2002, og eftir 1. viðgerð tann 28. februar 2002 er málið beint fíggjarnevndini.

Fíggjarnevndin hevur viðgjørt málið og hevur undir viðgerðini havt fund við Sámal Petur í Grund, landsstýrismann.

Undir viðgerðin er upplýst, at feilur av misgáum er í viðmerkingunum. B játtanin og sundurgreinaða ætlanin skal síggja soleiðis út:

 B. Játtanir

Sundurgreinað ætlan

Fíggjarnevndin hevur undir viðgerðini býtt seg í ein meiriluta og ein minnilutan.

Meirilutin (Finnbogi Arge, Jógvan Durhuus, Heini O. Heinesen og Kári P. Højgaard) vísir á, at landsstýrimaðurin hevur upplýst nevndini, at leiðslan á Landsstjúkrahúsinum metir, at tað er rættast at skifta sengurnar út í stigum, soleiðis sum skotið er upp í løgtingsmáli nr. 1-6/2001: Uppskot til eykajáttanarløgtingslóg fyri februar 2002 - 2, har mælt verður til, at peningur verður játtaður til at keypa 40 nýggjar sengur í ár. Meirilutin setir tí einki uppskot fram.

Minnilutin (Vilhelm Johannesen, Flemming Mikkelsen og Lisbeth L. Petersen) tekur undir við málinum og mælir Løgtinginum til at samtykkja uppskot Javnaðarfloksins. Í aðru syftu tekur minnilutin undir við uppskoti landsstýrisins í løgtingsmáli nr. 1-6/2001: Uppskot til eykajáttanarløgtingslóg fyri februar 2002 – 2.

2. viðgerð 13. mars 2002.  Uppskotið fall 14-1-14. Málið sostatt fallið. Málið avgreitt.