Samtíðarskattur verður kravdur sambært løgtingslóg nr. 86 frá 1. september 1983 um landsskatt og kommunuskatt og løgtingslóg nr. 87 frá 1. september 1983 um áseting av skatti til landskassan.

Inntøkuskattur hjá fysiskum persónum. Inntøkuskatturin fevnir um:

- landsskatt

- kommunuskatt (herundir atvinnuskatt)

- kirkjuskatt

Inntøkugrundarlagið fevnir um teir persónar, sum sambært nevndu lóg skulu gjalda skatt í Føroyum.

Útrokningargrundarlag

Pr. 1. september í 1998 eru 547 mió.kr. afturhildnar í A-skatti (landskassans partur). Framroknað til eitt heilt ár verður roknað við, at samlaða inntøkan verður 833 mió.kr. Roknað verður við umleið somu inntøku í 1999.

Í 1998 eru útskrivaðar 79 mió. kr. í B-skatti. Landskassans partur er 52%, svarandi til 41 mió. kr. Roknað er við umleið sama B-skatti í 1999.

Í samband við at flestu frádráttirnir vóru avtiknir og gjørdir til útgjaldsskipanir frá 1. januar 1997, bleiv sjálvuppgávan gjørd einfaldari og ein automatiserað skattauppgerð innførd. Sum eitt úrslit af hesum arbeiði, er avlopsskatturin í lutfall til undanfarnu árini blivin helvtaður og írestandi skatturin somuleiðis nógv minkaður.

Frá 1. januar 1998 vóru í skattalógini innførdar serligar skattaskipanir fyri fiskimenn og sjómenn fyri at geva teimum somu sømdir sum sjómenn í grannalondum okkara. Við broytingunum var eisini ynskt at fasthalda teimum undir føroysku skipanini. Tær broyttu reglurnar vóru mettar til at hava við sær minni inntøku til landskassan uppá 28 mió. kr.

Persónsskatturin er settur saman av hesum høvuðspostum:

Fyribilsskattur 1998 er tað, sum er inngoldið í fyribilsskatti skattaárið 1998, (gjaldsmeginregla)

Endalig uppgerð fyri 1997: Munurin millum tað, ið er inngoldið í 1997 og endaligu álíkningina fyri 1997.

Broytingar í skattauppgerð 1984-97: Broytingar í inntøkuførda skattinum árini frammanundan verða inntøku- og útreiðsluførdar í 1998.

Útskrivaður B-skattur fyri 1998.

Til og við 1996 var inngoldni B-skatturin í sjálvum fíggjarárinum pluss munin millum álíknaðan og goldnan B-skatt árið frammanundan tikin við sum inntøka.

Broytingin í meginreglunum verður gjørd í samsvar við §14 í kunngerð nr. 14 um roknskaparverk landsins o.a. frá 22. august 1996.

Talan er ikki um at avskriva/eftirgeva krøv, men um roknskapartøkniligar avsetingar. Krøvini verða avskrivað yvir konto fyri avseting, sum er ein fíggjarstøðukonto. Krav verður avkrivað tá tað hevur mist rættargildið.

Tap uppá skuldarar er av Fíggjarmálastýrinum mett til 10 mió. kr., men hendan metan er samanbundin við stórari óvissu. Í upphæddini er morarenta av skatti ikki roknað.

Felagsskattur verður kravdur sambært løgtingslóg nr. 86 frá 1. september 1983 um landsskatt og kommunuskatt og løgtingslóg nr. 87 frá 1. september 1983 um áseting av skatti til landskassan.

Inntøkuskattur hjá juridiskum persónum. Inntøkuskatturin fevnir um:

- landsskatt

- kommunuskatt (herundir atvinnuskatt)

Inntøkugrundarlagið fevnir um teir persónar, sum sambært nevndu lóg skulu gjalda skatt í Føroyum.

Miðskeiðis september 1998 eru uml. tveir triðingar av sjálvuppgávum hja partafeløgum uppgjørd, (tvs. innkomnar sjálvuppgávur, men uttan mettar sjálvuppgávur). Skattskylduga inntøkan fyri roknskaparárið 1997 er fyri hesar fyribils uppgjørdar til 478 mió. kr. Av 478 mió. kr. skulu gjaldast 143 mió. kr. í skatti, harav skulu 62 %, t. e. 88,7 mió. kr. gjaldast landskassanum. Við øllum partafeløgum gjørdum upp, vantast, at landskassans partur av skattinum verður uml. 110 mió. kr.

Partafelagsskatturin sum fellur til gjaldingar í 1999, er álíknaður í roknskapinum, sum endar í 1998. Tá tann búskaparliga gongdin hevur verið ógvuliga positiv higartil í 1998, verður roknað við nakað hægri felagsskatti í 1999.

Vinningsbýtisskattur verður kravdur sambært § 30 í løgtingslóg nr. 86 frá 1. september 1983 um landsskatt og kommunuskatt.

Avgjald av vinningsbýti, sum partafeløg, lutafeløg o.o. feløg, skrásett í Føroyum jbr. § 1 nr. 8-15 í skattalógini, rinda út, og sum útlutandi felagið skal afturhalda og rinda Føroya Gjaldstovu.

Útrokningargrundarlag: Avgjald uppá 35% av útlutaðu upphæddini.

Mett verður, at vinningsbýtisskatturin lækkar úr 31 mió. kr. í 1998 til 22,5 mió. kr. í 1998 og skyldast hetta í høvuðsheitinum væntandi lægri útluting úr Føroya Banka.

Roknskaparmeginregla: Feløg sum útluta vinningsbýti, skulu rinda avgjald til landskassan. Avgerandi fyri í hvørjum fíggjarári skattur av vinningsbýti verður tikin við, er nær vinningsbýtið fellur til gjaldingar. Vinningsbýtið, sum fellur til gjaldingar í 1998 verður tikið við í 1998.

Avgjald av kapitaleftirlønum verður kravt sambært løgtingslóg nr. 51 frá 29. desember 1971 um skatt av rentutryggingum v.m. við seinni broytingum.

Avgjald (35%) verður tikið við útgjalding av kapitaleftirlønum við heimild í § 6, b) og c) eftir reglunum í § 7, 1. stk. í samband við:

Sambært § 7, 2. stk. verður 40% avgjald tikið við útgjalding av kapitaleftirlønum. Hesa reglu hevur Líkningarráðið so at siga bert nýtt í samband við útgjalding, tá persónur fer úr føroysku skattaskipanini (flytir av landinum).

Inntøkugrundarlagið fyri avgjald av kapitaleftirlønum er sera skiftandi m.a. orsakað av fólkafráflytingini, so tað er ikki gjørligt at gera neyvar metingar um inntøkurnar. Uppá longri sikt væntar landsstýrið, at avgjald av kapitaleftirlønum fer at vaksa uppá 7 mió. kr. árliga.

Løgtingslóg nr. 87 frá 5. juni 1992 um rentuskatt

Renta, sum føroyskir peningastovnar og postgiro geva av innistandandi peningi, og sum likamligir persónar og deyðsbúgv undir skattaskyldu eftir §1 í løgtingslóg nr. 86 frá 1. september 1983 um landsskatt og kommunuskatt hava rætt til.

Somuleiðis hava Íleggingargrunnurin fyri Føroyar, Menningargrunnur Ídnaðarins, Føroya Ídnaðargrunnur og Færøernes Realkreditinstitutt skyldu at gjalda rentuskatt av rentu, vunnin í føroyskum eins og útlendskum peningastovnum og av inntøku, ið útlendsk virðisbrøv kasta av sær.

Fyrra hálvár 1998 gav eina inntøku uppá 15 mió. kr. Fyri fíggjarárið 1998 verður roknað við eini inntøku uppá 30 mió. kr.

Mett verður, at inntøkan í 1999 verður á leið tann sama.

Arvagjøld verða kravd sambært fólkatingslóg frá 27. mars 1908, sett í gildi við kongaligari fyriskipan nr. 468 frá 8. novembur 1921 við seinni broytingum.

Meginparturin av arvagjaldinum verður goldið landskassanum, meðan ein minni partur fer í ríkiskassan.

Meirvirðisgjald verður kravt sambært løgtingslóg nr. 136 frá 8. september 1992 við seinni broytingum.

Avgjald skal rindast til landskassan í øllum liðum av vinnuligari sølu av vørum og tænastum og við innflutningi úr útlondum.

Til 1. august í ár vøru 340 mió. kr. avgjaldsroknaðar í innflutnings-MVG. Framroknað til 12 mánaðir verður inntøkan sostatt 582 mió. kr. Inntøkan er vanliga heldur hægri í seinna hálvári enn í fyrra. Inntøkan fer væntandi at liggja um 605 mió. kr. í 1998. Roknað verður við somu inntøku í 1999.

Sølu-MVG, tvs. positivar uppgerðir minus negativar uppgerðir minus endurgjøld til kommunur, gav 36 mió. kr. í 1997. Uppgerðir fyri fyrra hálvár benda á, at inntøkan verður nakað minni í 1998. Inntøkan av sølu-MVG verður væntandi 25 mió. kr. í 1998. Roknað verður við somu upphædd í 1999.

Roknað verður sostatt við at samlaða meirvirðisgjaldsinntøkan verður 630 mió. kr. í 1999.

Roknskaparmeginregla.

Høvuðsreglan er, at MVG-inntøkurnar vera førdar á tí fíggjarári, tá kravið er gjaldkomið. Tvs. at eitt krav, sum stavar frá síðsta ársfjórðingi í 1998, fellur til gjaldingar 10. februar í 1999, og verður sostatt tikið við sum inntøka á fíggjarárinum 1999.

Fyri vikuavrokningar er galdandi nær uppgávan er innlisin í skipanina.

Fyri MVG-endurgjald fyri kommunur er avgerandi fyri hvat tíðarskeið, upphæddin verður útgoldin.

Tollavgjøld verða kravd sambært § 2 í Løgtingslóg nr. 120 frá 23. desember um avgjald á framleiðslu og innflutningi við tilhoyrandi frumskjali 1.

Tollgjald er GATT-tollur, ið er ásettur fyri hvørt vørunummar sær í Toll- og Vøruskránni. Eingin GATT-tollur verður roknaður av innflutningi úr ES- og EFTA-londunum.

Pr. 1. august eru 13 mió. kr. gjaldsroknaðar. Fyri alt árið verður inntøkan væntandi 22 mió. kr. Roknað verður við somu inntøku í 1999.

Punktgjøld verða kravd sambært § 2 í Løgtingslóg nr. 120 frá 23. desember um avgjald á framleiðslu og innflutningi við tilhoyrandi frumskjali 1.

Pr. 1. august eru 88 mió. kr. gjaldsroknaðar. Fyri alt árið verður inntøkan væntandi 155 mió. kr. Roknað verður við somu inntøku í 1999.

Lønhæddargjald verður kravt sambært løgtingslóg nr. 193 frá 10. desember 1993 um lønarhæddaravgjald.

Avgjald gjalda hesi virki, sum móti samsýning lata tænastur:

Pr. 1. august vóru rokningar útskrivaðar fyri 6,7 mió. kr. Framroknað til eitt heilt ár gevur hetta 11 mió. kr. Roknað verður við somu inntøku í 1999.

Brennioljugjald verður kravt sambært løgtingslóg nr. 179 frá 18. desember 1992 um serligt avgjald á brenniolju

Eitt gjald til landskassan uppá 0,95 kr. pr. litur verður lagt á søluna av gassolju. Fyri gassolju latin til skip yvir 20 GT skal einki gjald rindast.

Sambært kunngerð nr. 96 frá 29. juni 1994 um endurgjald av serligum oljugjaldi kunnu ávís meirvirðisgjaldsskrásett virki fáa góðkenning at fáa endurrindað avgjaldið til landskassan, ið er álagt sambært omanfyri nevndu lóg.

Tann 1. august í ár vóru 43,3 mió. kr. avgjaldsroknaðar netto. Framskrivað til 12 mánaðir verður inntøkan sostatt um 74 mió. kr. Orsakað av, at nettoinntøkan vanliga er minni í seinna hálvári, verður roknað við, at samlaða inntøkan verður umleið 65 mió. kr. í 1998. Roknað verður við somu inntøku í 1999.

Framleiðsluavgjøld verða kravd sambært § 4 í Løgtingslóg nr. 120 frá 23. desember 1991 um avgjald á framleiðslu og innflutningi við tilhoyrandi frumskjali nr. 1

Inntøkugrundarlagið er framleiðslan av sterkum øli av kl. I og A. Gjaldið er 7,60 fyri kl. I og 10 kr. fyri kl. A.

Tann 1. august vóru 9,1 mió. kr. avgjaldsroknaðar. Framskrivað gevur hetta eina inntøku uppá 16,0 mió. kr. í 1998. Mett verður, at inntøkan av framleiðslugjaldi verður 16 mió. kr. í 1999.

Skrásetingargjald verður kravt sambært løgtingslóg nr. 175 frá 18. desember 1992 um skrásetingargjald á motorakfør v.m. við seinni broytingum.

Fyri motorakfør v.m., sum eru skrásetingarskyldug eftir ferðslulógini, verður ásett skrásetingargjald, sum byggir á eitt virðisgjald. Gjaldið verður rindað í landskassan, samstundis sum akfarið verður skrásett.

Rakstrarstaðið umfatar eisini burturbeiningargjald og umskrásetingargjald.

Tann 1. august í ár vóru avgjaldsroknaðar 38,2 mió. kr. í skrásetingargjaldið. Beinleiðis framskrivað gevur hetta eina inntøku uppá 70 mió. kr. um árið. Av tí at bilasølan er munandi minni í vetrarhálvuni verður ikki roknað við, at skrásetingargjaldið verður meira enn slakar 60 mió. kr. í 1998. Landsstýrið roknar við, at bilasølan verður nakað minni í 1999. Roknað verður tí við, at skrásetingargjaldið verður 55 mió. kr. í 1999.

Vegskattur verður kravdur sambært løgtingslóg nr. 38 um vegskatt av motorakførum v.m. frá 31. mars 1982 við seinni broytingum.

Til 1. august í ár vóru 32,8 mió. goldnar í vegskatti. Henda upphædd umfatar bæði gjøldini, ið falla til gjaldingar ávikavist 1. januar og 1. juli. Talið av bilum veksur spakuliga. Roknað verður tí við 33,5 mió. kr. í inntøku í 1998 og á leið somu inntøku í 1999.

Ferðaavgjald verður kravt sambært løgtingslóg nr. 37 frá 26. mai 1988 um ferðagjald við seinni broytingum

Fyri ferðafólk, ið verða flutt úr Føroyum, skulu 120 kr. frá 1. juni 1994 gjaldast til landskassan. Hetta gjald var áður 300 kr.

Pr. 1. september í ár vóru 4,5 mió. kr. avgjaldsroknaðar í ferðaavgjaldi. Tá ferðamynstrið verður havt í huga, kann roknast við, at inntøkan í 1998 verður umleið 7,5 mió. kr. Roknað verður við somu inntøku í 1999.

Umhvørvisavgjald á smyrjiolju verður kravt sambært løgtingslóg nr. 75 frá 13. mai 1992.

Inntøkugrundarlagið er innflutningur og framleiðsla av smyrjiolju sbr. vørunr. 2710.00.81 og 2710.00.89 í toll- og vøruskránni. Avgjaldið er 1 kr. pr. ltr.

Til 1. september í ár vóru 1,1 mió. kr. avgjaldsroknaðar í umhvørvisgjaldi á smyrjiolju. Framroknað verður inntøkan sostatt um 2 mió. kr. í 1998. Roknað verður við somu inntøku í 1999.

Fíggingargrunnin frá 1992, ið eigur mestsum allan partapeningin í P/F Føroya Banka, er ogn landskassans. Sambært avtaluni millum Ríkissjórnina og Føroya landsstýri frá 10. juni 1998 skal ríkisstjórnin í hesum árinum taka seg burtur úr Fíggingargrunninum frá 1992 og verður tað landstýrið, sum velur allar limirnar.

Føroya Banki hevur seinasti árini inntøkuført stórar upphæddir í áður hava verið avsettar móti tapi av skuldaru. Roknast kann ikki við tílikum stórum inntøkuføringum framyvir. Av hesi orsøk verður roknað við lægri útluting úr Fíggingargrunninum framyvir.

Gjald sum verða latin fyri handilsloyvi og loyvi til taxakoyring. Persónar lata eitt gjald uppá kr. 200 og partafeløg kr. 500.

Gjøld fyri skeinkiloyvi verða kravd sambært kunngerð nr. 60 frá 7. mai 1992 um skeinkingarloyvi.

Fyri skeinkingarloyvi til øll sløg av rúsdrekka er gjaldið kr. 10.000,-. Fyri skeinkingarloyvi einans til øl og borðvín er gjaldið kr. 5.000,-.

Gjøld fyri navnaprógv verða kravd sambært kunngerð nr. 18 frá 21. januar 1993 um gjøld fyri navnaprógv v.m., við seinni broytingum.

Fyri navnaprógv verður latið eitt gjald uppá kr. 1.000,- til landskassan.

Inntøkugrundarlagið er m.a. niðanfyrinevndu bøtur:

Parkeringsbøtur, sekt - skattalóg nr. 48 frá 21.06.1985 (§ 125), og fiskaríbøtur.

Avgjald av vinningi verður latið sambært løgtingslóg nr 49 frá 15.juni 1950 um føroyskan happadrátt, við seinni broytingum. Vinningarnir verða útgoldnir móti einum gjaldi uppá 10% til landskassan. Vinningarnir eru undantiknir inntøkuskatti til landskassa og kommunur.

Gjald sum verður latið sambært løgtingslóg nr. 11 frá 1968 um gjald av vinningi við burturluting v.m. Ístaðin fyri inntøkuskatt skal latast gjald, sum er 15%, til landið av hvørjum vinningi, sum hevur meira virði enn kr. 500.

Samb. løgtingslóg nr. 142 frá 10. juni 1993 og kunngerð nr. 111 frá 17. oktober 1994, skal elinnleggjari til tess at fáa og varðveita løggilding sum elinnleggjari gjalda eitt árligt gjald - vanliga gjaldið er kr. 1.000, sum skulu verða goldnar frammanundan í seinasta lagi 15. januar í árinum.

Samb. løgtingslóg nr. 40 frá 17. apríl 1986 við seinni broytingum, serliga broyting nr. 104 frá 21. mai 1993, skal partaeigari, ið hevur átt meira enn 25% av partapeninginum ella rátt yvir meira enn 50% av atkvøðunum, onkuntíð 5 ár undan sølu av partabrøvum, skal rinda eitt avgjald uppá 25% av mununum millum útveganar- og søluvirðið. Við avhendingini eftir 10. árið eftir útveganina skal einki avgjald roknast av vinninginum.

Henda undirkonto verður nýtt til óvanligar inntøkur og útreiðslur.