Játtanin fer til rakstur av bókasøvnum. Alt bókasavnsvirksemi verður nú greinað undir hesi høvuðskonto. Inntøkufíggjað virksemi er nýggj undirkonto, meðan høvuðskonto 7.24.3.04. Fólkabókasøvn (Rakstrarjáttan) nú er undirkonto undir 7.24.3.01. Bókasøvn.

Sum tjóðbókasavn hevur Landsbókasavnið fleiri aðrar uppávur enn fólkabókasøvnini: Føroyadeild savnsins:

• skrásetur alt føroyskt tilfar, og tilfar sum hevur við Føroyar at gera,
• skipar fyri árligari útgáva av føroyskum bókalista,
• avgreiðir ella fyrisitur forlags- og prentskyldu, bókasavnsgjaldið, altjóða bóka- og tíðarritsskrásetingarskipanirnar ISBN og ISSN til føroyskar bøkur og tíðarrit,
• umsitur studningin til fólka- og skúlabókasøvn. Skrásetur, greiður og innbindur alt bókasavnstilfar til 17 fólka- og skúlabókasøvn í Føroyum.

Umleggingin frá kortskráseting til edv-skráseting av øllum tilfari heldur fram. Alt bókalán fer nú fram um edv-skipanina, sum í løtuni hýsir einari skráseting av umleið 60.000 bókum.

Undirkonto 7.24.3.01.20. Føroya Landsbókasavn. Sambært løgtingslóg frá 1952 skal Føroya Landsbókasavn:

• savna allar føroyskar bókmentir og so mikið sum gjørligt av bókmentum um Føroyar,
• vera meginbókasavn fyri allar Føroyar,
• vera vísindabókasavn.

So leingi sum lógin um megin-, fólka- og skúlabókasøvn frá 1988 ikki virkar, sum hon skal, er tað harafturat álagt Landsbókasavninum at røkja tær umsitingarligu uppgávurnar, sum við henni fylgja.

Undirkonto 7.24.3.01.40. Inntøkufíggjað virksemi. Føroya Landsbókasavn fekk í 1996 loyvi at seta ein bókavørð, sum hevur til uppgávu at skráseta bókasøvn á ymiskum almennum stovnum, skúlum, hjá felagsskapum o.ø. Arbeiðið verður gjørt fyri rokning. Landsbókasavnið leggur høli og skrivstovuútgerð til, meðan stovnarnir sjálvir rinda fyri tænastuna. Eitt av endamálunum við hesi skráseting er, at tað í framtíðini skal bera til, um eina bókasavnstelduskipan at síggja, hvørjar bøkur eru hvar í landinum.

Undirkonto 7.24.3.01.21. Fólkabókasøvn. Umframt Føroya Landsbókasavn, ið virkar eftir sjálvstøðugari lóg, eru í Føroyum 25 fólka- og skúlabókasøvn, sum virka eftir løgtingslóg um megin-, fólka- og skúlabókasøvn frá 9/6-1988. Sambært endamálsgreinini hava bókasøvnini skyldu til at fremja upplýsing, lærdóm og mentanarvirksemi. Til hetta hava bókasøvnini til taks bøkur og annað hóskandi tilfar, sum verður lænt út fyri einki.

Føroya Landsbókasavn umsitur studningin til fólka- og skúlabókasøvn. Studningurin er 60% av rakstrarútreiðslunum og verður goldin afturút fyri eitt ár í senn.

Hækkingin er ein liður í mentanarpolitisku raðfestingini og hevur til endamáls at gera bókasavnsverkið betur ført fyri at virka eftir lógini.

Starvsfólkayvirlit: 20. Føroya Landsbókasavn.

7.24.3.07. Føroya landsskjalasavn (Rakstrarjáttan)

Endamál og uppgávur Landsskjalasavnins eru ásett í løgtingslóg nr. 49 frá 28. apríl 1992, Landsstýrisins kunngerð nr. 117 frá 5. juli 1995, Landsskjalasavnsins kunngerð nr. 1 frá 25. juli 1995 og avtalu millum donsku stjórnina og landsstýrið frá 30. mars og 12. oktober 1990 um skjalasøvn hjá stovnum ríkisins í Føroyum. Sambært avtaluni verða skjalasøvnini hjá ríkisstovnum umsitin eftir donskum reglum, og tí galda ásetingarnar í Lov nr. 337 af 14. maj 1992 om offentlige arkiver m. v. og Kulturministeriets bekendtgørelse nr. 878 af 21. oktober 1992 om offentlige arkivalier og om offentlige arkivers virksomhed fyri hesi søvn. Stovnurin umsitur sostatt bæði føroyska og danska lóggávu og hevur sama myndugleika mótvegis donskum ríkisstovnum í Føroyum, sum Statens Arkiver hava mótvegis almennum stovnum í Danmark.

Landsskjalasavnið skal sambært lóg og kunngerðir:

1. tryggja varðveitingina av savnindum (skjølum), ið hava søguligt virði og/ella hava fyrisitingarligan og rættarligan týdning fyri borgarar og myndugleikar,
2. gera tað møguligt at vraka savnindi, ið ikki eiga at verða varðveitt,
3. hava savnindi tøk hjá myndugleikum og almenningi og
4. inna gransking við tilknýti til søvnini.

Almennir stovnar hava skyldu at avhenda landsskjalasavninum savnindi (bøkur, skjøl. disklar, bond, kort, myndir v.m.), tá hesi eru 30 ára gomul. Savnindi kunnu bert verða vrakað (fyribeind) við loyvi frá landsskjalasavninum. Herumframt hevur landsskjalasavnið lógásetta skyldu at tryggja privat skjøl, ið verða hildin at hava stóran granskingarligan ella mentanarligan týdning. Eisini hevur landsskjalasavnið eftir lógini skyldu at inna gransking í tilknýti til søvn tess. Virksemið og raðfestingin av høvuðsuppgávum og undiruppgávum í hesum sambandi eru ásett í "Verkætlan fyri landsskjalasavnið 1995-2000".

Stovnurin hevur við lógini frá 1992, kunngerðini frá 1995 og avtaluni frá 1990 (92) fingið álagt eina nýggja uppgávu: eftirlit við journalskipanum og skjalagoymslum úti á stovnunum og ráðgeving í hesum sambandi.

7.24.3.08. Føroya landsskjalasavn (Løgujáttan)

7.24.3.10. Føroya fornminnissavn (Rakstrarjáttan)

Føroya Fornminnissavn virkar sambært hesum lógum:

• Ll. 32/1952 um fornminnissavn
• Ll 19/1948 um at friða fornminni og bygningar
• Ll. 17/1972 um bygdarsøvn

Endamálið við stovninum er, at hann skal skráseta, kanna og hava eftirlit við jarðføstum fornminnum, sum lýst er í løgtingslóg um at friða føst fornminni og bygningar. Fyrireika og standa fyri, tá ið toftir og forn búpláss umframt søgulig lendi verða grivin út. Savna, skráseta og sýna fram fornlutir og lutir frá nýggjari tíð, sum lýsa livihátt, starvslíkindi og mentan føroyinga til ymsar tíðir ella eru knýttir til søguligar hendingar. Hava í hondum savnan av staðarnøvnum og munnliga goymdum søguminnum og hava hetta tilfar greitt til vísindaliga granskan.

7.24.3.12. Føroya fornminnissavn (Løgujáttan)

7.24.3.13. Føroya náttúrugripasavn (Rakstrarjáttan)

Játtanin er til Føroya Náttúrugripasavn (Djóradeild og Plantudeild), til Føroya Jarðfrøðisavn og til samstarvið GEUS/ Føroya Jarðfrøðisavn. Hetta er virksemi, sum fer fram á Náttúrugripasavninum, ella í samstarvi við Náttúrugripasavnið.

Nú er játtanin til Náttúrugripasavnið lutað í tríggjar undirkonti, til tess at skina millum, hvat er til jarðfrøði, og hvat er til annað virksemi á savninum. Ein partur av útreiðslunum til oljujarðfrøðiligt virksemi á Jarðfrøðisavninum, verður fíggjað av Oljufyrisitingini, fyri tænastur savnið veitur Oljufyrisitingini.

Føroya Náttúrugripasavn varð sett á stovn við løgtingslóg nr. 26. frá 17. august 1955, sum er broytt við løgtingslóg nr. 69 frá 5. juni 1986.

Sambært § 2 er virksemi stovnsins:

· at savna, varðveita og framsýna náttúrugripir, sum lýsa náttúru landsins

· at savna, varðveita og handfara náttúruvísindaligt tilfar

§ 3 í lógini staðfestir, at savnið er í trimum deildum:

· Jarðfrøðisavnið

· Djórasavnið og

· Plantusavnið

Síðan ráðevnini í undirgrundini vóru yvirtikin í 1992, hevur Jarðfrøðisavnið havt ábyrgdina av øllum jarðfrøðiligum spurningum og kanningum. Altjóða vísindaliga samstarvið er økt nógv tey seinru árini.

Djórasavnið er saman við Heilsufrøðiligu Starvsstovuni, Plantusavninum og Jarðfrøðisavninum við í Umhvørviseftiransingarætlanini undir Norrøna Ráðharraráðnum. Djórasavnið situr í vísindanevnd bæði hjá Altjóða Hvalaveiðunevndini (IWC), NAMMCO og ICES. Øll loyvi sambært Washington-sáttmálanum um hótt djórasløg verða givin av Djórasavninum. Deildin gevur undantaksloyvi sambært fuglaveiðilógini, ráðgevur í hvala- og fuglaveiðispurningum, gevur fráboðanir um skaðadjór og kannar djór á landi. Tey seinastu 16 árini er stórur dentur lagdur á hvalakanningar. BIOFAR verkætlanin er knýtt at Djórasavninum.

Plantusavnið. Verkætlanir: Kannar og skrásetur plantuvøksturin á sjóvarklettunum í samband við Farcos ætlanina. Luttekur í umhvørvisverkætlan. Ger frágreiðing um lívfrøðiligt margfeldi í Føroyum. Er við í verkætlan um hvørji árin verðurlagsbroytingar hava á føroysku og grønlendsku náttúruna. Tekur lut í tí partinum av BIOFAR verkætlanini, sum snýr seg um plantuvøkstur á sjóvarklettinum.

Virksemi á Jarðfrøðisavninum hevur seinastu árini verið merkt av forkanningum fram ímóti ætlaðum oljuleitingum kring Føroyar. Savnið hevur ábyrgdina av jarðfrøðiliga kanningararbeiðinum í samstarvi við Oljufyrisitingina.

Forkanningarnar av føroysku undirgrundini hava verið munandi meira umfatandi enn roknað varð við í fyrstani. Gjørdar eru ymiskar seismiskar kanningar, magnetiskar kanningar, tyngdarmátingar, royndarkanningar av havbotninum, kanningar úr flogfari, dýbdarkanningar í Lopra, umframt aðrar vísindaligar kanningar. Jarðfrøðisavnið hevur í hesum sambandi ábyrgdina av at skráseta, goyma og tulka kanningartilfarið til tess at staðfesta, hvørji øki eru áhugaverd, tá bjóðast skal út til veruligar oljuleitingar.

Sambært avtalu millum Føroya Landsstýri og Danmarks og Grønlands Geologiske Undersøgelse (GEUS), skal GEUS lata Jarðfrøðisavninum øll kanningarúrslit, dagbøkur, royndarlutir o.a. við tilknýti til arbeiði teirra í Føroyum til varðveitslu.

Jarðfrøðisavnið skal gjalda fyri arbeiðshøli o.a. hjá GEUS í Føroyum, fyri kanningar av felags áhuga, umframt at rinda GEUS lønarútreiðslur aftur, sum samsvara einum vísindafólki.

Lógargrundarlagið er Ll. nr. 17 frá 9. mai 1972 um bygdarsøvn við mentanarsøguligum virksemi. Landsantikvarurin umsitur játtanina. Landið letur góðkendum bygdarsøvnum studning, sum er 60% av rakstrarútreiðslunum. Í bygdarsøvnunum verður varðveitt ymiskt søguligt tilfar, sum hevur týdning fyri bygdirnar.

7.24.3.19. Friðað hús og fornminni (Rakstrarjáttan)

Lógargrundarlagið er Ll. nr. 19/1948 um at friða fornminni og bygningar. Landsantikvarurin umsitur játtanina. Játtanin er til at reka friðaðar landsognir, sum eru álagdar Fornminnisavninum at umsita, umframt til at samsýna fornminnisnevnd og stuðul til friðað hús og fornminni, sum ikki eru landsogn.

7.24.3.20. Menning av mentan og mentanararvi (Rakstrarjáttan)

Játtanin verður nýtt til at menna søvnini, ið umsita mentunararvin, m.a. við at betra um KT-viðurskiftini á stovnunum.

Listasavn Føroya er sjálvsognar stovnur, ið fevnir um framsýningarhúsið Listaskálan, aðrar ognir og almenna savnið av føroyskari list. Endamálið er at umsita listasavnið, økja um tað við at keypa føroyska list, at skráseta og varðveita savnið, at skipa fyri føroyskum listaframsýningum í Listaskálanum, aðrastaðni í Føroyum og uttanlands, og eisini at sýna fram útlendska list í Føroyum.

Listasavn Føroya verður rikið við rakstrarjáttan á fíggjarløgtingslógini og egnum inntøkum av framsýningum og kaffistovu. Sum stýri verður vald nevnd við fýra limum. Føroya Landsstýri velur formannin, sum hevur tvær atkvøður. Nevndin setur fyristøðumann.

Skálin við Skálá og Norðoya Listafelag fáa játtaðar 15.000 kr. í part.

7.24.3.23. Kirkjubømúrurin (Løgujáttan)

Arbeitt verður við at varðveita múrin.