Tingskipanin § 24, stk. 5
Stk. 5. Um í minsta lagi 5 limir ynskja tað, kunnu nevndirnar, hóast regluna í stk. 4, seta løgmanni ella landsstýrisfólki spurningar um ávís viðurskifti. Spurningarnir verða settir skrivliga, og nevndin kann biðja um skrivligt svar, ella at løgmaður ella landsstýrisfólkið kemur á fund við nevndina at svara spurningunum. Er eingin freist ásett, eiga spurningarnir at verða svaraðir innan 2 vikur eftir, at teir eru settir. Sær løgmaður ella landsstýrisfólk seg ikki ført fyri at svara, skal viðkomandi skjótast tilber við skrivligari grundgeving boða nevndini frá hesum.
Mannagongd
Um nevndarlimur ynskir samráð, eigur hann at venda sær til formannin í nevndini um at kalla nevndina til fundar at taka støðu til, um undirtøka er fyri hesum, t.e. at 5 nevndarlimir taka undir við ynskinum. Kallað verður inn til fundar á vanligan hátt.
Spurningarnir, sum ætlaðir eru at seta løgmanni ella landsstýrisfólki, verða lagdir fram á nevndarfundinum. Um spyrjarin ynskir, at nevndarlimirnir fáa spurningarnar innan fundin, má hann sjálvur skipa fyri hesum.
Um nevndin ger av, at samráð skal verða, tekur nevndin støðu til hetta:
Nevndarskrivarin ger spurningarnar klárar. Nevndarformaðurin skrivar undir skrivið, ið verður sent løgmanni ella landsstýrisfólkinum. Hetta skriv verður lagt á heimasíðuna, sum nevndarskjal, um ikki serligar orsakir eru til, at málið skal viðgerast í trúnaði.
Munnligt samráð
Tá løgmaður ella landsstýrisfólk kemur á fund, fær tann, sum hevur ynskt samráðið, orðið at grundgeva fyri spurningum sínum.
Løgmaður ella landsstýrisfólkið fær síðan orðið at svara. Nevndarlimir eiga ikki at umrøða svarið, men kunnu seta fram ískoytisspurningar. Løgmaður ella landsstýrisfólkið kann velja at svara hesum spurningum skrivliga. Ískoytisspurningar eiga at vera um sama evni, sum upprunaspurningarnir vóru um, og kann løgmaður ella landsstýrisfólkið nokta at svara, um hildið verður, at spurningur er farin út um evni.
Ískoytisspurningar verða endurgivnir í gerðabókini, um ikki serligar orsakir eru til, at spurningarnir eru í trúnaði.
Tá spurningarnir eru svaraðir, fer løgmaður ella landsstýrisfólkið av fundi, og nevndin viðger tá, um svarið er nøktandi, ella um fleiri spurningar eiga at verða settir. Um so er, er mannagondin tann sama, sum ásett omanfyri.
Tað er ikki loyvt at endurgeva frá tí, sum farið er fram á fundinum, men løgmaður, landsstýrisfólkið og nevndarlimir kunnu greiða frá egnum sjónarmiðum.
Um løgmaður ella landsstýrisfólkið gevur nevndini sítt talupappír, verður hetta lagt á heimasíðuna sum nevndarskjal uttan so, at tað verður latið í trúnaði.
Til tess at forða fyri, at misskiljingar koma í, verður tað, sum fer fram á hesum fundum, bandað.
Skrivligt samráð
Mannagongdin er tann sama við tí undataki, at løgmaður ella landsstýrisfólkið svarar skrivliga. Spurningar og svar verða løgd á heimasíðu tingsins, sum nevndarskjøl, um ikki serligar orsakir eru til, at málið skal viðgerast í trúnaði.
Samtykt á fundi í formansskapinum 5. oktober 2023
Bjørt Samuelsen
forkvinna /Johnhard Klettheyggj
stjóri